११ साउन, पर्सा । अख्तियारले एक लाख १० हजार घुससहित पर्साको धोबिनी गाउँपालिकाका लेखापाल कृष्णनन्दन राय यादव र नायबसुब्बा एनामुल हक अन्सारीलाई नियन्त्रणमा लिएको छ ।
अख्तियार दुरुपयोग अनुसन्धान आयोगको हेटौंडा कार्यालयबाट खटिएको टोलीले शुक्रबार विहान उनीहरुलाई घुससहित रंगेहात पक्राउ गरेको थियो ।
अख्तियारको हेटौंडा कार्यालयका शाखा अधिकृत विकास वि.क. र प्रहरी निरीक्षक लक्ष्मणबहादुर खड्का नेतृत्वको टोलीले उनीहरुलाई वीरगञ्ज महानगरपालिका-१४ पिपरामा रहेको डेराबाट नियन्त्रणमा लिएको हो । उनीहरुलाई शुक्रबार नै हेटौंडा लिइएको छ ।
यादव र हकले उपभोक्ता समितिसँग विकास निर्माणको कामको रकम भुक्तानी दिएवापत कमिशनस्वरुप एक लाख १० हजार रुपैयाँ घुस लिएको दावी अख्तियारको छ ।
