२५ साउन, काठमाडौं । पुँजी बजार लगानीकर्ताहरुका लागि यो साता दुखद बनेको छ । साताभरमा भएको ५ दिनको कारोबारमा पाँचै दिन अधिकांश समूहहरु राताम्मे देखिँदा लगानीकर्ताहरुले करोडौं रुपैयाँ गुमाएका छन् ।
यस साता कारोबार रकममा भारी गिरावट आयो । साउन २० गतेदेखि २४ गतेसम्म भएको कारोबार एक अर्ब रुपैयाँ पनि पुग्न सकेन ।
यस साता नेपाल स्टक एक्सचेन्जमा १ सय ८१ कम्पनीहरुको सेयर कारोबार भएको छ । सातामा १६ हजार ३ सय ७० कारोबारबाट ३६ लाख ४७ हजार आठ सय ४० कित्ता सेयर खरिद बिक्री भएका छन् । जसबाट जम्मा ९१ करोड ८७ लाख ३२ हजार रुपैयाँको मात्रै कारोबार भएको छ । कारोबार रकम गत साताको भन्दा १४ दशमलव ६८ प्रतिशत कम हो ।
गत साता १८१ कम्पनीको ४० लाख ८४ हजार पाँच सय २० कित्ता सेयरहरु खरिद बिक्री हुँदा एक अर्ब सात करोड ६७ लाख ४८ हजार रुपैयाँको सेयर कारोबार भएको थियो ।
नेप्से परिसूचकमा ९.२५ अंकको गिरावट
यस साता कारोबार रकमसहित नेप्से परिसूचकसमेत ओरालो लागेको छ । साताको नेप्से परिसूचक पहिलो दिनको तुलनामा ९.२५ अंकले ओरालो लागेको छ ।
साताका ५ दिन नै लगानीकर्ताका लागि फलदायी नबनेको सेयर बजार परिसूचक नेप्से अन्तिम दिन १ हजार १ सय ८० दशमलव ६३ अंकमा पुगेको छ ।
‘क’ वर्गका कम्पनीहरुको कारोबार मापन गर्ने सेन्सेटिभ इन्डेक्स पहिलो दिनको तुलनामा १.८४ अंकले घटेर २४९.१३ अंकमा आइपुगेको छ ।
कारोबार रकममा प्रोग्रेसिभ फाइनान्स पहिलो
यस साता कारोबार रकमका आधारमा प्रोग्रेसिभ फाइनान्स एक नम्बरमा दलेखिएको छ । सातामा पाँच करोड ९० लाख ४० हजार रुपैयाँ कारोबार गर्दै प्रोग्रेसिभ फाइनान्स लिमिटेड संस्थापक अग्रस्थानमा देखिएको हो ।
त्यसैगरी कारोबार भएको सेयर संख्याका आधारमा पनि प्राग्रेसिभ नै अगाडि देखिएको छ । पाँच लाख ८५ हजार कित्ता कारोबार संख्याका आधारमा प्रोग्रेसिभ फाइनान्स संस्थापक अग्रस्थानमा देखियो ।
त्यसैगरी कारोबार संख्याको आधारमा भने नेपाल लाइफ इन्स्योरेन्स्ा कम्पनी लिमिटेड अग्रस्थानमा रहेको छ । यस साता नेपाल लाइफको ८ सय ७७ वटा कारोबार भएको थियो ।
कारोबार रकमका आधारमा प्रोग्रेसिभ फाइनान्स पछि क्रमशः नेपाल लाइफ इन्स्योरेन्स कम्पनी लिमिटेड, फस्ट माइक्रोफाइनान्स डेभलपमेन्ट बैंक लिमिटेड, छिमेक लघुवित्त वित्तीय संस्था लिमिटेड र सानिमा माई हाइड्रोपावर लिमिटेड अग्रस्थानमा देखिएका छन् ।
यस साता नेपाल स्टक एक्सचेन्जको कारोबार कक्ष नियमित कारोबारका लागि पाँच दिन खुला रहृयो । यस साता पनि ऋणपत्रतर्फ संस्थागत तथा सरकारी ऋणपत्रहरुको कुनै पनि कारोबार भएन ।
समूहगत परिसूचकहरुको उतारचढाव टेवलमा हेर्नुहोस् :
