Comments Add Comment

अब ट्याक्सी ड्राइभरलाई ड्रेसको साटो ज्याकेट !

ट्याक्सी ड्राइभरका लागि तयार गरिएको ज्याकेट देखाउँदै एसएसपी पन्त ।

५ भदौ, काठमाडौं । उपत्यकाका ट्याक्सी ड्राइभरहरुका लागि छुट्टै ड्रेस तय गर्ने विषयमा पटकपटक छलफल भए पनि निष्कर्षमा नपुगेपछि अर्को उपाय निकालिएको छ ।

महानगरीय ट्राफिक महाशाखाले ट्याक्सी ड्राइभरलाई छुट्टै ड्रेसको सट्टामा पहेँलो फ्लोरेसेन्ट ज्याकेटको लगाउनु पर्ने व्यवस्था लागू गर्न लागेको हो ।

बुधबारदेखि ट्याक्सी चालकलाई अनिवार्य रुपमा ज्याकेट लगाउनु पर्ने नियम लागू गर्न लागिएको हो ।

चालकको पहिचान झल्किने गरी ट्याक्सी व्यवसायी संघको सहकार्यमा ड्रेसको साटो ज्याकेट लगाउनु पर्ने व्यवस्था लागू गरिएको महाशाखाले जनाएको छ ।

महाशाखाका प्रमुख एसएसपी वसन्त पन्तले अनलाइनखबरसँग कुरा गर्दै ट्याक्सी चालकहरुले बुधबार बिहानदेखि फ्लोरेसेन्ट ज्याकेट लगाउने बताए ।

‘संघले एउटै रंगको ज्याकेट व्यवस्था गरेको छ । त्यसलाई न्यूनतम मूल्यमा खरिद गरेर उनीहरुले लगाउनेछन्’, पन्तले भने, ‘यसले सर्वसाधारणलाई चालकको पहिचान गर्न सहज हुने विश्वास लिएका छौं ।’

‘सार्वजनिक सवारीमा यात्रुमाथि चालक र सहचालकबाटै दुव्र्यवहार हुने गरेको गुनासो आउने गरेका छन्’, उनले थपे, ‘यसले सर्वसाधारणले चालकको पहिचान गर्नेछन् भने चालकहरु पनि आफ्नो पेशाप्रति उत्तरदायी हुनेछन् ।’

‘यदी उनीहरुले ज्याकेट लगाएनन् भने पहिलो चरणमा सचेत गराउँछौं’, महाशाखाका एक अधिकारीले भने, ‘त्यसपछि पनि अटेर गरे केही कानुनको दायरामा ल्याउँछौं ।’

यातायात व्यवस्था कार्यालय, बागमती मातहत हाल ११ हजार ट्याक्सी चालक रहेको जनाइएको छ ।

यो खबर पढेर तपाईलाई कस्तो महसुस भयो ?

ट्रेन्डिङ

Advertisment