१ असोज, वीरगञ्ज । पर्साको ठोरी गाउँपालिकामा जंगली हात्तीको आक्रमणबाट एक युवतीको मृत्यु भएको छ । हात्तीको आक्रमणबाट नुवाकोट घर भएकी २३ वर्षीया रेजिना वाईवाको मृत्यु भएको हो ।
ठोरी गाउँपालिका वडा नम्बर ३ शिकारीबास पुल नजिकै हात्तीको आक्रमणबाट उनको मृत्यु भएको इलाका प्रहरी कार्यालय ठोरीका प्रमुख प्रमेश विष्टले जानकारी दिए । वाईबा ठोरीको-१ विजयबस्तीस्थित खाजा घरमा १ वर्षदेखि काम गर्दै आईरहेकी थिइन् ।
गर्मी छल्नका लागि राति कोठाबाट बाहिर निस्किएको समयमा उनलाई हात्तीले आक्रमण गरेको स्थानीयले बताएका छन् ।