पहिले प्रदर्शन मिति तय गरेर ठूलै युद्ध जिते जस्तो गर्ने अनी पछि पछाडि हट्ने नेपाली चलचित्रकर्मीको बानी नै हो । चलचित्रको कथा नै तयार नभई प्रदर्शन मिति बुक गर्न नेपाली चलचित्रकर्मीलाई कसैले सक्दैन । यो बर्षको दशैं सकिएको छ । तर, अर्को बर्षको दशैंका लागि ३ वटा चलचित्रले डेट बुक गरिसकेका छन् । यी तिनै चलचित्रको छायांकन पनि सुरु भएको छैन ।
प्रकाश सुवेदीको निर्देशनमा तयार हुन लागेको चलचित्र ‘बकम्फुसे राजा’ र रेनशा वान्तवा राइको निर्देशनमा तयार हुन लागेको चलचित्र ‘आई एम ट्वान्टी वान’ले अर्को बर्षको दशैंमा रिलिज मिति घोषणा गरिसकेका छन् ।
अब यो सूचीमा निर्देशक अशोक शर्माको नयाँ चलचित्र पनि सामेल भएको छ । हलमा चलिरहेको चलचित्र ‘जय भोले’ले एक सातामै लगानी सुरक्षित गरेको दाबी गर्दै यसका निर्माता तथा निर्देशक शर्माले अर्को बर्षको दशैंमा ‘रातो टिका निधारमा’ रिलिज गर्ने बताएका छन् । चलचित्र ‘जय भोले’ले एक सातामा करिब ३ करोड ग्रस कलेक्शन गरेको उनको दाबी छ ।
चलचित्र ‘रातो टिका निधारमा’मा कलाकार पनि फाइनल भएका छैनन् । यो चलचित्रमा अशोकले नै बनाएको ‘अल्लारे’ चलचित्रको ‘रातो टिका निधारमा टलक्क टल्कियो’ बोलको गीत पनि समावेश हुनेछ ।
