९ कात्तिक, काठमाडौं । अर्थमन्त्री डा. युवराज खतिवडाले बैंकिङ कसुरले सोझासीधा सर्वसाधारणलाई समस्या परेको बताएका छन् । नेपाल क्लियरिङ हाउसले ल्याएको कनेक्ट आईपीएस प्रणालीको शुक्रबार उद्घाटन गर्दै अर्थमन्त्री खतिवडाले ठगलाई कारबाही गर्नका लागि बनाइएको कानूनले धेरै सोझासीधा सर्वसाधारण जनता झुक्किएर कारबाहीको भागेदार भएको बताएका हुन् ।
‘कतिपयले झुक्किएर चेकको मिति राखेर काट्ने गरेका कारण सजायको भागेदार बन्नु परेको छ’ उनले भने, ‘कानून ठगका लागि बनाइएको हो, तर झुक्किएर सोझा मान्छे यो कानूनको भागेदार बन्नु परेको छ ।’
अर्थमन्त्री खतिवडाले नगरदरहित कारोबारलाई प्राथमिकता दिनु पर्ने समेत बताए । धेरै वर्ष पहिले गाउँमा जाँदा झुत्रा नोटको समस्या जताततै देखिने गरेको र त्यो समस्या अहिले पनि रहेको भन्दै उनले प्रविधिको प्रयोग बढाउदै यस्ता समस्या समाधान गर्नु पर्नेमा जोड दिए ।
राजश्व बुझाउन अहिले पनि धेरै समस्या रहेको भन्दै क्लियरिङ हाउसले ल्याएको कनेक्ट आइपीएस प्रणालीले यसलाई ठूलो मद्दत पुग्ने धारणा राखे ।
क्लियरिङ हायसले ल्याएकेा नयाँ प्रविधिको स्वागत गर्दै नेपाल राष्ट्र बैंकका गभर्नर डा. चिरञ्जीवि नेपालले प्रविधिका हिसाबले मुलुक धेरै पछाडि रहेको र यसको प्रयोग बढाउनुपर्ने बताए ।
क्लियरिङ हाउसले ल्याएको उक्त प्रविधिले बैंक खातामार्फत मोवाइलबाटै सरकारी राजश्व तथा विभिन्न अनलाइन पेमेन्टहरु गर्न सकिने बताइएको छ ।
कनेक्ट आईपीएस ई–पेमेन्टको वेभसाइट तथा मोवाइm एप्लिकेशन समेत कार्यक्रममा शुभारम्भ गरियो । यस प्रणालीबाट बैंकका ग्राहकहरुले सरकारी राजश्व भुक्तानी, रकम ट्रान्सफर लगायतका विभिन्न भुक्तानीहरु सहज तरिकाले गर्न सकिन्छ ।
यस प्रणालीमा हालसम्म ४४ वटा बैंक तथा वित्तीय संस्थाहरु आवद्ध भइसकेका छन् भने ३२ वटा बैंक तथा वित्तीय संस्थाहरुले उक्त सेवा शुचारु समेत गरिसकेका छन् ।
