२९ कात्तिक, काठमाडौं । रोजगारीका लागि साउदी अरबमा रहेका नेपालीहरुले देउसीभैलोबाट संकलित रकम मिर्गौला पीडितलाई सहयोग गर्ने जनाएका छन् ।
जिफन्ट सहयोग समूह ‘साउदी अरब’ को पहलमा भएको देउसी भैलोबाट संकलित रकम उनीहरुले बागलुङ मेसीखोला गाउँपालिका-६ का मिर्गौला पीडित दीपक घर्तिमगरलाई सहयोग गर्ने जनाएका हुन् ।
देउसी भैलोबाट २६ हजार ७ सय (८६० रुपैयाँ साउदी रियाल) रुपैयाँ संकलन भएको जिफन्ट सहयोग समूह ‘साउदी अरब’का केन्द्रीय सदस्य रोशन राजभण्डारीले जानकारी दिए ।
लामो समयदेखि मिर्गौला पीडित घर्तिमगरको हाल नेपालमै उपचार भइरहेको उनले बताए । जिफन्ट सहयोग समूह ‘साउदी अरब’ ले साउदीको कतिफ र जुबेलमा देउसीभैलो खेलेर उक्त रकम संकलन गरेको थियो ।
