७ मंसिर, काठमाडौं । ऊर्जा,जलस्रोत तथा सिंचाईमन्त्री बर्षमान पुन ‘अनन्त’ र चिनियाँ राजदूत यु होङबीच भेटवार्ता भएको छ । सिंहदरवारस्थित ऊर्जामन्त्रालयमा भएको भेटवार्तामा द्विपक्षीय हितका साथै ऊर्जा क्षेत्रमा गर्न सकिने सहकार्यका विषयमा छलफल भएको थियो ।
भेटमा मन्त्री पुनले नेपालमा पाँच वर्षको लागी स्थायी सरकार भएको भन्दै अहिले देशको मुख्य प्राथमिकता भनेकै विकास र समृद्धि भएको धारणा राखे ।
नेपाली लागि चिनियाँ राजदूतको कार्यकाल सकेर चीन र्फकने तयारीमा रहेकी चिनियाँ राजदूतले मन्त्री पुनसंग विदाइ भेट गरेकी हुन् ।
भेटवार्ताका क्रममा ऊर्जामन्त्री पुनले राजदूत होङको कार्यकालमा दुई देशबीचको मैत्रीपूर्ण सम्बन्ध निकै सुदृढ भएको धारणा राखे । उनले आगामी दिनमा समेत दुई मुलुकको सम्बन्ध अझै प्रगाढ वन्ने विश्वास व्यक्त गरे ।
मन्त्री पुनले विगत केही वर्षयता नेपालको जलविद्युत क्षेत्रका साथै अन्य क्षेत्रमा बढेको चिनियाँ लगानी नेपालको आर्थिक विकासका लागी निकै फलदायी हुने बताए ।
उनले राजदूत होङको कार्यकालमा उच्चस्तरीय भ्रमण आदान-प्रदान भएको, उर्जा क्षेत्रमा इनर्जी कोअपरेशनमा हस्ताक्षर हुनुका साथै चीनबाट लगानी भित्र्याउन गरेको प्रयत्नप्रति नेपाल सरकारको तर्फबाट धन्यवाद व्यक्त गरे ।
‘नेपालको आर्थिक विकासमा चीन सरकार र यहाले गरेको प्रत्यन र पहलप्रती हामी आभारी छौ, आगामी दिनमा पनि दुई देशको सम्बन्ध र सहकार्य अझ नयाँ उचाईमा पुग्नेछ भन्ने हामीले विश्वास लिएका छौ ।’ उर्जामन्त्री पुनले राजदूतसँगको भेटमा भने ।
नेपाल कम्युनिष्ट पार्टीका स्थायी समिति सदस्य समेत रहेका ऊर्जामन्त्री पुनले ४०० केभी क्षमताको गल्छी-केरुङ अन्र्तदेशिय प्रशारण लाइन नेपालको उच्च प्राथमिकतामा रहेको धारणा राखे ।
भेटमा उक्त परियोजनालाई अघि बढाउनेबारे छलफल भएको उर्जामन्त्रीका प्रेस संयोजक रोशन खड्काले जानकारी दिए । मन्त्री पुनले नेपाल र चीनबीच केही समयअघि मात्र सहमति भएको ट्रेड एण्ड ट्रान्जिट प्रोटोकल नेपालको स्वाधीनताको लागी ऐतिहासिक समझदारी भएको धारणा राखे ।
उनले यसअघि नै नेपाल-चीनबीच उर्जा संयन्त्रको पहिलो वैठक सफलतापूर्वक सम्पन्न भएको भन्दै वेइजिङमा छिट्टै दोस्रो बैठक बस्ने खवर आफुले पाएको बताए ।
भेटमा चिनियाँ राजदूत होङले उर्जा संयन्त्रको अर्को वैठक वेइजिङमा छिट्टै बस्ने र त्यसमा दुई देशको बीचमा उर्जा क्षेत्रमा गर्न सकिने थप सहकार्यबारे घनिभुत छलफल हुने जानकारी समेत दिइन् ।
उनले नेपालमा पछिल्लो तीन वर्षमा चिनियां लगानी ६ सय ८० प्रतिशतले वृद्धि भएको भन्दै चीन प्रत्यक्ष लगानीतर्फ नेपालमा एक नम्बरमा रहेको जानकारी समेत दिइन् ।
‘पछिल्लो समय चिनियाँ लगानीकर्ताहरु नेपालमा लगानी गर्न आकषिर्त हुनुभएको छ, आगामी दिनमा समेत यो प्रक्रिया निरन्तर जारी रहनेछ ।’ राजदूत होङले भेटमा भनिन् ।
