४ पुस, काठमाडौं । ‘राणाहरुले आफ्ना मान्छेलाई ए क्लासमा राख्थे भने मन नपरेका, आलोचना गर्नेहरुलाई सी, डी क्लासमा राख्थे । हाम्रो पार्टीमा त्यस्तै भएको छ । क्षमता, योग्यता, बरिष्ठता सबैलाई हेरेर निश्पक्ष ढंगले जिम्मेवारी दिइनुपर्छ ।’
यो भनाइ स्थायी कमिटीको बुधबारको बैठकमा नेकपा नेता रघुजी पन्तले व्यक्त गरेका हुन् । पन्त मात्रै होइन, सत्तारुढ नेकपाको जारी स्थायी कमिटीको बैठकमा बोल्ने अधिकांश नेताहरु पार्टी र सरकारको कामप्रति रुष्ट देखिएका छन् ।
बुधबार पन्तसहित ८ नेताले बोलेका थिए, जसमध्ये सुरेन्द्र पाण्डे, भीम आचार्यले पार्टी अध्यक्ष एवं प्रधानमन्त्री केपी शर्मा ओलीमाथि प्रश्न उठाए । प्रश्न उठाउने तीनैजना माधव नेपाल पक्षका नेता हुन् ।
बैठकमा सहभागी नेताहरुका अनुसार नेकपाको जारी स्थायी कमिटी बैठकमा पूर्वएमालेका नेताहरु अध्यक्ष ओलीसँग बढी रुष्ट देखिएका छन् ।
तत्कालीन एमालेमा ओली र माधवकुमार नेपाल गुट थियो, जुन अहिले पनि कायमै छ । पार्टी एकताका नाममा ओली समूहले फरक विचार राख्ने नेता कार्यकर्तालाई छानीछानी सिध्याउने काम गरेको आरोप नेपाल पक्षीय नेताहरुको छ ।
जारी स्थायी कमिटीमा ओलीको आलोचना गर्नेमा अधिकांश नेपाल निकटवर्तीहरु नै छन् । पहिलो दिन घनश्याम भुसाल, युवराज ज्ञवाली, अष्टलक्ष्मी शाक्य, वेदराम भुसाल तथा दोस्रो दिन योगेश भट्टराई र भीम रावल आक्रामक थिए ।
बैठकमा भीम आचार्यले पार्टीभित्र न्याय मर्दै गएको टिप्पणी गरेका थिए भने सुरेन्द्र पाण्डेले विगतमा केही नेताले दलालहरुलाई प्रयोग गर्ने गरिएकोमा अहिले दलालहरुले नेताहरुलाई प्रयोग गरेर आफू अनुकुल काम गराइरहेको बताए ।
मंगलबारको बैठकमा घनश्याम भुसालले थुक, खकार, रगत र वीर्य परीक्षण गरेर आफ्नो र अर्को गुट छुट्याउने काम गरिको भन्दै यस्तो गुटको नेता (ओली)लाई म मान्दिनँ भनेका थिए ।
माधव नेपालको अग्निपरीक्षा
नेकपाको स्थायी कमिटी बैठकमा माधव नेपाल पक्षीय नेताहरुले आफ्नै नेतालाई पनि छाडेका छैनन् । खासगरी विवादास्पद एसिया प्यासिफिक समिटमा सहभागितालाई लिएर प्रधानमन्त्री ओलीसँगै नेता नेपालको चर्को आलोचना भएको छ ।
बैठकमा नेता नेपालले बोल्न बाँकी छ । पार्टी एकतापछि अध्यक्ष ओलीसँग अन्तर संघर्षभन्दा सहकार्यलाई बढी जोड दिएका छन् । अब जारी स्थायी कमिटीमा बैठकमा उनले पार्टी नेतृत्वको ‘पेलानको प्रतिवाद गर्छन् कि गर्दैनन्, हेर्न बाँकी छ ।
विशेष गरी पूर्वएमाले समूहमा रहेका संस्थापन इत्तरका नेताहरु केपी ओली पक्षले लामो समयदेखि पेल्दै आएको गुनासो गर्छन् । पार्टीभित्र विगतमा राणाहरुले गर्ने ‘सी क्लास’ को जस्तै व्यवहार भइरहेको उनीहरुको गुनासो छ ।
स्थायी कमिटीको बैठकमा बोल्दै योगेश भट्टराईले क्षमतावान नेता घनश्याम भुसाललाई लामो समयसम्म जिम्मेवारीविहीन राखिनु पूर्वाग्रह शिवाय अरु केही नभएको बताएका थिए ।
तीन दिनयता स्थायी कमिटीको बैठकमा २६ जनाले बोलिसकेका छन् । अब १९ जनाले बोल्न बाँकी छ । पहिलो दिन १० जना र बाँकी दुई दिन ८/८ जना नेताहरुले बैठकमा धारणा राखिसकेका छन् । बैठकमा बोल्ने बहुमत सदस्यले प्रधानमन्त्री एवं अध्यक्ष केपी ओलीको चर्को आलोचना गरेका छन् ।
नेकपा बैठकको रुझान हेर्दा केपी ओलीको विपक्षमा स्वर चर्को बन्न थालेको देखिन्छ । तर, यो असन्तुष्टिको निकास कस्तो आउँछ भन्नेबारे अहिले नै नेताहरुले विश्लेषण गर्न सकेका छैनन् । माधव नेपाल समूहका एक नेताले अनलाइनखबरसँग भने- ‘स्थायी कमिटी बैठकमा जे भएको छ, राम्रै भइरहेको छ ।’
तर, माधव नेपाल पक्षले गरेको यस्तो दाबीले मात्रै नेपाल पक्षको माग पूरा हुँदैन । पेलानमा परेको गुनासो गर्दै आएको नेपाल पक्षको असन्तुष्टिले अब नेकपामा कसरी निकास र समाधान पाउला ? नेकपामा यो अन्योल कायमै छ ।
किनभने, जारी स्थायी कमिटी बैठकमा प्रधानमन्त्री केपी ओली र अध्यक्ष प्रचण्डले खुलेर आफ्ना कुराहरु राख्न स्थायी कमिटी सदस्यहरुलाई आग्रह गरेको ओली पक्षका नेताहरु बताउँछन् । त्यसैले, बैठकमा असन्तुष्टिहरु आउँदैमा केपी ओली कमजोर नहुने संस्थापन पक्षको जिकिर छ ।
यो अवस्थामा माधव नेपाल पक्षमा देखिएको चुनौती के हो भने केवल असन्तुष्टि पोखेर ‘आङको छारो’ मात्रै खसाल्ने वा समस्याको ठोस सभान पनि खोज्ने ?
बैठकमा माधव नेपालले कुनै लिखित प्रस्ताप पेश गरेका छैनन् । बरु अर्का नेता वामदेव गौतमले फरक मत पेश गरेर फरक मतको नेता बन्ने प्रयास गरेको देखिन्छ ।
वामदेवमाथि कटाक्ष
नेकपाको स्थायी कमिटी बैठकमा फरक मत राखेर नेता वामदेव गौतमले पार्टीभित्र प्रतिपक्षीय नेता बन्ने प्रयास गरेका त छन् । तर, पार्टी अध्यक्ष ओलीको विरोध गर्ने नेताहरुले गौतमलाई सहजै स्वीकार गरेको देखिन्न । बरु कटाक्ष नै गरेका छन् ।
नेता रघुजी पन्तले हिजो सयौं नेता कार्यकर्तामाथि गुटको पेलाइमा पर्दा नबोलेका गौतम आफूले घुस्सा खाएपछि चर्को स्वर गर्न आएको टिप्पणी गरे । यसअघि केपी ओलीसँग मन नमिलेपछि वामदेवले फरक मत राखेको हो भने त्यो फरक मतको वस्तुगत आधार नै गलत हुने योगेश भट्टराईले बताएका थिए ।
गौतमको केही कुरा राम्रो भएपनि उनको प्रस्तावले पनि सामाधान नदिने नेताहरु बताउँछन् ।
‘सचिवालयलाई निरंकुश नबनाऔं’
स्थायी कमिटीको बैठकमा नेताहरुले सचिवालयमा अधिकार केन्द्रित गर्नु गलत भएको बताएका छन् । नेता रघुजी पन्तले राजनीतिक तथा नीतिगत निर्णय गर्ने अधिकार सचिवालयलाई दिन नसकिने बताए । स्थायी कमिटीले पास गरेको विधानमा आफू खुसी थपघट गरिएकोमा असन्तुष्टि जनाउँदै उनले सचिवालय निरंकुश हुन खोजेको टिप्पणी गरे ।
हालै मात्र प्रदेश कमिटीहरु गठन गर्दा योग्यता नपुगेकाहरुलाई समेत राखिएको भन्दै उनले छानविनका लागि स्थायी कमिटीले कार्यदल बनाउनुपर्ने बताए ।
अर्का स्थायी कमिटी सदस्य पाण्डेले सचिवालयलाई कोर अफ लिडरसिप भनिएकोमा प्रश्न उठाएका छन् । मदन भण्डारीको पालामा एमाले नेताहरुको मर्यादाक्रम तोक्न नसकेर ‘अल्फाबेटिकल अर्डर’ अनुसार नाम राख्नु परेको स्मरण गर्दै उनले भने, अहिले तपाईंहरु चाहिँ कसरी कोर अफ लिडरसिप हुनुभयो ?’
