
१० चैत, कैलाली । धनगढी—अत्तरिया सडकखण्ड अबरुद्ध भएपछि बिरामी र सर्वसाधारणले सास्ती खेप्नुपरेको छ ।
धनगढी उपमहानगरपालिका—३ मा रहेको रिचमण्ड फेलोसिप पुनर्स्थापना गृहका स्टोर किपर २९ वर्षका जनक ढुंगालको तीन दिनअघि मृत्यु भएपछि दोषीलाई कारबाहीको माग गर्दै मृतकका आफन्तले सडक अवरुद्ध गरेका हुन् । सडक अवरुद्ध हुँदा बिरामी र सर्वसाधारणहरु मर्कामा परेका हुन् ।
सवारी साधन चल्न नदिएपछि एक जना बिरामी महिला स्लाइनसहित सडकमै पल्टिएकी छन् ।
धनगढी भएर सुदूरपश्चिमका पहाडी जिल्ला र कञ्चनपुरका लागि छुट्ने यातायातका साधनसमेत बन्दका कारण प्रभावित भएका छन् ।
बन्दका कारण यात्रुहरु धनगढीमा अलपत्र परेका छन् । धनगढीबाट गेटा बिमानस्थलसम्म पनि जान कठिनाइ भएको छ ।
जिल्ला प्रहरी कार्यालय कैलालीका प्रमुख प्रहरी उपरीक्षक आभूषण तिम्सिनासंगको छलफलमा बिहान केही बेर मृतकका आफन्त सडकको अबरोध हटाउन सहमत भए पनि उनीहरुले उपरीक्षक तिम्सिना फर्केलगत्तै पुनः बन्द गरेका हुन् ।
मृतकका आफन्तहरुले बन्द र बार्ता संगसंगै गर्ने अडान लिएका छन् । उनीहरुले ढुंगालको मृत्यु शंकास्पद रहेको भन्दै पुनर्स्थापना केन्द्रका सञ्चालकलाई नियन्त्रणमा लिई कारबाही गर्नुपर्ने अडान राखेका छन् ।
प्रतिक्रिया 4