२१ चैत, विराटनगर । वैदेशिक रोजगारीका लागि इराक पठाइदिने भन्दै झापाका तीन युवालाई दलालको समूहले काठमाडौं लगेर एक महिना राख्यो । इराकको कुर्दिस्थान पठाउने प्लेन टिकट र भिसासहितको पासपोर्ट हातमा थमाइदिएर उनीहरुसित २ लाख २० हजार रुपैया असुल गरिएको थियो ।
काठमाडौंमा एक महिना राखेपछि उनीहरुलाई दिल्ली लगियो । तर, दिल्लीमा उनहिरुलाई अलपत्र छोडेर दलालहरु हिँडे । इराक जाने आशमा दुई लाख भन्दाबढी रकम खर्चिएका उनीहरु दिल्लीमा तीन दिन अलपत्र परे । खर्च अभाव भएपछि घरबाट पैसा मगाएर गाउँ फर्किए ।
यी तीन युवा हुन्, झापा गौरादहका घनश्यामप्रसाद सिंह, पिताम्बर राजवंशी र उदय राजवंशी । दलालको समूहले झापाका युवालाई यसरी विदेशी भूमिमा लगेर अलपत्र छोडेको यो पहिलो घटना होइन । यसअघि गौरदहका रन्जय राजवंशी, मन्जय राजवंशी, जयनन्दकुमार मण्डल, बलराम मण्डल र मिलन मगरलाई भारतको मणिपुर पुर्याएर अलपत्र छाडेका थिए उनीहरुले ।
बर्मा हुँदै इराक जाने प्रलोभनमा परेर मणिपुरमा १६ दिन बसेका ती युवाहरुलाई भारतीय प्रहरीले पक्राउ गरी नेपाललाई बुझाएको थियो । गत माघ तेस्रो साता उनीहरुसहित विभिन्न स्थानबाट मणिपुर पुर्याइएका १७९ नेपाली युवायुवतीको उद्दार गरिएको थियो । उद्धार गरिएकाहरु सबै घर फर्किए । तर पैसा फसेपछि उनीहरु तनावमा छन् ।
मणिपुर र दिल्लीमा अलपत्र बनेर फर्किएका १० जना युवाहरु दलाललाई पक्राउ गरी कारवाहीको माग गर्दै श्रम कार्यालय विराटनगर आएका छन् । उनीहरुले इराक पठाइदिने भन्दै गौरदह र आसपासका १० जना युवाहरुबाट १६ लाख ३० हजार रुपैया उठाएर दलाल फरार भएको भन्दै श्रम कार्यालयमा उजुरी गरेका छन् ।
दश जनालाई विदेश पठाउने दलालहरु पनि गौरादहकै हुन् । लेखराज राजवंशी, कृष्णराज राजवंशी र रामसिंह राजबंशी गाउँ छाडेर फरार भएको पिडितको भनाइ छ ।
उजुरी दिनेहरुमा रंजयकुमार राजवंशी, मन्जयकुमार राजवंशी, भीमप्रसाद राजवंशी, राजेशकुमार राजवंशी, घनश्यामप्रसाद सिंह, तिर्थप्रसाद राजवंशी, जीतबहादुर राजवंशी, पिताम्बर राजवंशी, जयनन्दनकुमार मण्डल र बलराम मण्डल छन् ।
सुपरमार्केट र होटलमा पठाउने भन्दै प्रतिव्यक्ति ६० हजारदेखि साढे ३ लाखसम्म उठाएर दलाल फरार भएको जीतबहादुर राजवंशीले बताए । दश जनाले लिखित उजुरी गरेपछि श्रम तथा रोजगार कार्यालय विराटनगरका प्रमुख प्रेमप्रसाद सञ्जेलले झापा र काठमाडौं प्रहरीमा बिहिवार पत्र लेखेका छन् । उनले ठगी गर्नेलाई पक्राउ गरी उपस्थीत गराउन आग्रह गरेका छन् । गाउँमा दलाली काम गर्दै आएकाहरु पछिल्लो समय भागेर काठमाडौं बस्दै आएको बताइन्छ ।
बैदेशिक रोजगारीमा ठगिने क्रम पछिल्लो समय बढदै गएको छ । क्यानाडा, इराक लगायत देशमा श्रम गर्न जान पाउने आशामा ग्रामिण भेगका युवा ठगिएका हुन् ।
श्रम तथा रोजगार कार्यालय विराटनगरका प्रमुख सञ्जेल भन्छन्, ‘क्यानाडा जाने नाममा मोरङको सुनबर्सी, रंगेली र सुनसरीको रामधुनीमा सोझासाझा युवाहरु ठगिएको पाइएको छ ।’
क्यानाडा पठाउने भन्दै बाँकेका निरञ्जन पुरी, झापाका गणेप्रसाद गिरी र दिपेन्द्रकुमार झा सहितको समुहले डेढ करोडभन्दा बढी रकम लिएर फरार भएको उजुरी श्रम कार्यालयमा परेको छ ।
