तोकिएको पुँजी पुर्‍याउन बीमा कम्पनीलाई मुश्किल !

२४ चैत, काठमाडौं । बीमा कम्पनीहरुलाई तोकिए अनुसारको पुँजी पुर्‍याउन मुश्किल परेको छ । बीमा क्षत्रेको नियमनकारी निकाय बीमा समितिले तोके अनुसारको पुँजी पुर्‍याउन बीमा कम्पनीहरुलाई मुश्किल परेको हो ।

बीमा समितिले निर्जीवन बीमा कम्पनीहरुलाई एक अर्ब रुपैयाँ चुक्ता पुँजी पुर्‍याउन निर्देशन दिएको छ । जीवन बीमाका लागि भने समितिले २ अर्ब रुपैयाँ चुक्ता पुँजी तोकेको छ । तर, अधिकांश बीमा कम्पनीहरुले पुँजी पुर्‍याउन लामो समयदेखि सकेका छैनन् ।

आर्थिक वर्ष २०७४/७५ को असामसान्तसम्ममा नै चुक्ता पुँजी पुर्‍याउन बीमा समितिले बीमा कम्पनीहरुलाई निर्देशन दिएको थियो । अधिकांश कम्पनीहरुले तोकिएको चुक्ता पुँजी पुर्‍याउन नसकेपछि बीमा समितिले ३/३ महिना गरेर बढीमा ६ महिनामात्रै समय थप गरिने बताएका थिए ।

त्यो ६ महिना पनि गत पुसमै पुरा भइसकेको छ । चालु आर्थिक वर्षको पुस मसान्तमा पनि बीमा कम्पनीहरुले पुँजी पुर्याउन नसकेपछि समितिले असारमसान्तसम्मको समय सीमा दिएको छ ।

थप गरिएको समय पनि सकिन पनि अब ३ महिनामात्रै बाँकी छ, तर अधिकांश बीमा कम्पनीहरुको पुँजी पुग्न सकेको छैन ।

कुन-कुन कम्पनीले पुर्‍याए पुँजी ?

हाल नेपालमा ३९ वटा बीमा कम्पनीहरु सञ्चालित छन् । जीवन बीमा तर्फ १९ र निर्जीवन बीमा तर्फ २० वटा कम्पनीहरु अहिले सञ्चालित छन् ।

सञ्चालनमा रहेका ३९ बीमा कम्पनीहरु मध्ये ४ वटा बीमा कम्पनीहरुले मात्रै तोकिए अनुसारको चुक्ता पुँजी पुर्‍याएको बीमा समितिका निमित्त कार्यकारी निर्देशक राजुरमण पौडेलले जानकारी दिए ।

निमित्त कार्यकारी निर्देशक पौडेलका अनुसार निर्जीवन तर्फ शिखर इन्स्योरेन्स कम्पनी, नेको इन्स्योरेन्स कम्पनी र हिमालय इन्स्योरेन्स कम्पनी गरी ३ वटाले तोकिएको पुँजी पुर्‍याएका छन् ।

जीवन बीमा तर्फ भने नेपाल लाइफ इन्स्योरेन्स कम्पनीले मात्रै पुँजी पुर्याएको पौडेलले बताए । असार मसान्तसम्म पनि पुँजी पुर्‍याउन नसके मर्जरमा लैजाने बीमा समितिको तयारी छ । यद्यपि, यस विषयमा समितिले कुनै निर्णय भने अहिले नै गरिसकेको छैन ।