१० वैशाख, काठमाडौं । काठमाडौंको विशालनगरमा विवाहित महिलाको घरमा ‘प्रेमी’को शव भेटिएपछि श्रीमान्-श्रीमती दुवै जनाविरुद्ध कर्तव्य ज्यान मुद्दाको अभियोगमा अनुसन्धान सुरू गरेको छ ।
महानगरीय प्रहरी वृत्त, कमलपोखरीले रामेछापको मिनप्रसाद श्रेष्ठको रहस्यमय मृत्यु प्रकरणमा सुनिता (नाम परिवर्तन) र उनका श्रीमानविरुद्ध कर्तव्य ज्यान मुद्दामा म्याद थप गरेको हो ।
वृत्तका प्रमुख रवीन्द्रनाथ पौडेलका अनुसार श्रेष्ठको परिवारले दिएको किटानी जाहेरीको आधारमा दुई जनालाई हिरासतमा राखेर अनुसन्धान थालिएको हो ।
‘वैशाख १ गतेको घटनामा हामीले भोलिपल्ट दुवैलाई नियन्त्रणमा लिएका थियौं’, डीएसपी पौडेलले अनलाइनखबरसँग भने, ‘पहिलो पटक ५ दिनलाई म्याद थप गरिएको थियो ।’
यो पनि पढ्नुस्– इजरायलको टिकट काटेकी सुनिताको घरमा ‘अवैध प्रेमी’को लास
७ वैशाखमा पुनः प्रहरीले जिल्ला अदालत, काठमाडौंबाट थप ७ दिन उनीहरुलाई अनुसन्धानका लागि हिरासतमा राख्ने अनुमति लिएको छ ।
मृतका आफन्त श्यामकुमार श्रेष्ठले घटनामा दुवै जनाको शंकास्पद भूमिका देखिएको दाबी गरेका छन् ।
उनले अनलाइनखबरसँग कुरागर्दै भने, ‘मिनप्रसाद किन त्यति राति आफैं अर्काको घरमा जान्छ ? कोही कराएको आवाज आएर श्रीमान् माथिल्लो तलामा उक्लिएका थिए भने मिनप्रसाद तल झर्दा किन उनले केही सुनेनन् ?’
हालसम्म प्रहरी अनुसन्धानले एकातिर श्रेष्ठको मृत्युलाई स्वभाविक देखाएको छ भने अर्कातिर परिवारको आशंकाले अनुसन्धान अधिकारीलाई नै अलमलमा पारिदिएको छ ।
