नेपाल चलचित्र कलाकार संघको निर्वाचनमा ५७ मतले अध्यक्ष पदमा पराजीत भएपछि विजयी भएका उम्मेदवार रविन्द्र खड्काको हात समात्दै पत्रकारको अगाडि आइपुगेकी सरिता लामिछानेको अनुहार दुःख, आक्रोश र सद्भाव सबै थियो ।
उनले, आफूले निर्वाचन हारेको सहर्ष स्विकार गर्दै रविन्द्रको टिमलाई शुभकामना दिइन् । तर, सरिताको बोली यत्तीमा मात्र टुंगिएन । उनले भनिन्–‘सायद, म भन्दा लोकप्रिय रविन्द्र दाई हुनुहुन्थ्यो होला र मैले हारेँ । यहाँ भित्र धेरै कुराहरु छ, भोली धेरै कुराहरु खोज्नुपर्ने हुन्छ । रविन्द्र दाइले जित्नुभएको छ, तर भोली आफूले गरेका प्रतिवद्धता पुरा गर्नुभएन भने म उहाँहरुको विरुद्धमा लाग्छु ।’
उनले अगाडि भनिन्–‘म दाइलाई भन्न चाहन्छु, नेपाल चलचित्र कलाकार संघमा राजनीति हाबी हुनु हुँदैन । म पनि कुनै पार्टीमा आस्था राख्छु । तर, मैले चलचित्र कलाकार संघमा पार्टी हाबी भयो भने सचेत गराउन आउँछु । म आग्रह गर्न चाहन्छु, संघलाई विशुद्ध कलाकारको घर बनाइदिनुहोस् । कलाकारको बारेमा बहस गर्नुहोस्, हाम्रा मुद्दामा राजनीति नगरिदिनुहोस् ।’
सरिताले यसो भन्दै गर्दा रविन्द्रले आफूले राजनीतिलाई अलग राखेको कारण नै जितेको बताए । उनले, चलचित्र कलाकार संघको हक हितका लागि काम गर्ने बताए ।
