८ असार, हेटौंडा । स्थानीय तहका पदाधिकारी र सदस्यको पारिश्रमिक अपुग भएको भन्दै काठमाडौं महानगरपालिकाका वडा सदस्य र नगरसभा सदस्यले बढाउन माग गरेका छन् ।
ऐन संशोधन गरी सुविधा बढाउन माग गर्दै हेटौंडा आइपुगेका काठमाडौं महानगरपालिकाका जनप्रतिनिधिले प्रदेश ३ का मुख्यमन्त्री र सभामुखलाई ज्ञापन पत्र बुझाएका छन् । अहिले वडा सदस्य र नगरसभा सदस्यले मासिक ७ हजार रुपैयाँ पाउँदै आएका छन् ।
महाननगरपालिकाको कार्यपालिका सदस्यको सुविधा मासिक १५ हजार पुग्दा पनि वडा र नगरसभा सदस्यहरुको सेवा सुविधा नबढेको काठमाडौं महानगरपालिका–४ का वडा सदस्य ध्रुवप्रसाद त्रिपाठीले बताए ।
उनीहरुले आफूहरुको सेवा सुविधा महानगरपलिकाको आन्तरिक स्रोतबाट वृद्धि गरी नगरपरिषदबाट अनुमोदन गर्न मिल्ने गरी ऐन संशोधन गर्न माग गरेका छन् ।
वडा सदस्य र नगरसभा सदस्यको ज्ञापन बुझ्दै प्रदेशसभाका सभामुख सानु श्रेष्ठ र आन्तरिक मामिला मन्त्री शालिकराम जमकटेलले माग उपयुक्त भए पनि सघीय सरकारले गरेको निर्णय अनुसार नै गरिएको बताए ।
