२७ असार, पोखरा । केही महिनाअघि पोखरा नयाँ बजारमा साना तथा ठूलो कुनै पनि सवारी साधन पार्किङ गर्न नपाइने महानगरले घोषणा गरेको थियो । घोषणामात्रै नभएर उक्त क्षेत्रमा ‘पार्किङ निषेध छ’ लेखिएको बोर्ड नै टाँसेको थियो ।
केही दिन पार्किङ गर्न बन्द पनि भयो । तर महानगरले चासो नदिँदा पुरानै समस्या पुन दोहोरिएको छ । पार्किङ नगर्नु भनेर लेखिएको बोर्ड वरिपरि नै सवारीसाधन यत्रतत्र पार्किङ गरिएको दृश्य देख्न सकिन्छ ।
यो पनि पढ्नुहोस अस्तव्यस्त पोखराः पार्किङस्थलमै सुपरमार्केट, सडकमै ठेक्का !शाखा सडक नै ढाकिने गरी अत्याधिक पार्किङ हुनेमा चिप्लेढुंगा, महेन्द्रपुल, पृथ्वीचोक, गैह्रापाटन लगायत क्षेत्र छन् ।महानगरका सूचना अधिकारी गंगालाल सुवेदी सवारी पार्किङलाई तत्काल व्यवस्थित गर्न कुनै पनि योजना नरहेको प्रष्ट्याए ।
‘शाखा बाटोमा पार्किङ नै गर्न नसक्ने भनेका छौं । तर महानगरले अहिले उचित योजना ल्याउन सकेको छैन,’ उनले भने, ‘शाखा बाटोमा पार्किङ गर्न नपाइने भए पनि त्यसलाई तत्काल कार्यान्वयन गर्न समस्या देखिएको छ ।’
नयाँ बजार क्षेत्रको पार्किङका लागि महानगले प्रदर्शनी केन्द्रअघिको खाली जग्गालाई रोजेको छ । सो क्षेत्र अपायक पर्ने सवारी चालकले गुनासो गर्दै आएका छन् ।
यो पनि पढ्नुहोस बसपार्कभरि आवादी, सडकभरि गाडी पार्किङ !पार्किङका लागि छुट्टै ठाउँ नभएपछि पोखरा महानगरले २०५७ सालदेखि सडक नै ठेक्कामा दिँदै आएको छ । महानगरले पार्किङ समस्यालाई व्यवस्थित गर्न सार्वजनिक–निजी साझेदारी अवधारणा अनुरुप काम गर्ने नीति लिएको छ ।
महानगर क्षेत्रभित्र पार्किङका लागि खाली जग्गा उपलब्ध गराउन सूचनासमेत प्रकाशित गरिसकेको छ । साझेदारी गर्न सूचना प्रकाशन गर्दा पनि निजी क्षेत्रले चासो देखाएको छैन । अहिले सोही सूचना दोस्रोपटक जारी गर्न लागिएको पोखरा महानगर ट्राफिक व्यवस्थापन समिति प्रमुख सुरेन्द्र पौडेल बताउँछन् ।
‘सूचना पहिले पनि जारी गरेका थियौं । तर आवेदन परेन,’ पौडेलले भने, ‘यसपटक भने धेरैजनाले रुचि देखाउनु भएको छ । यसपटक आवेदन पर्छ कि भनेका छौं ।’ सडकको एक किनारमा पार्किङ गर्ने र त्यसबाट राजस्व उठाउने गरी महानगरले ठेक्का दिँदै आएको हो । तर, सडकमै पार्किङ गर्न पाउने सुविधासहित पटकपटक टेन्डर आह्वान गर्दा पनि आवेदन पर्न सकेको छैन ।
पोखरा महानगरले २ वर्ष पार्किङका लागि सडक ठेक्का दिन टेन्डर सूचना नै ४ पटक निकालिसकेको छ । गत वर्षबाटै महानगरले टेन्डर आह्वान गर्दै आइरहेको छ । तर, पटकपटक टेन्डर आह्वान गर्दा पनि कसैको आवेदन नपरेको महानगरले जनाएको छ ।
महानगरले प्रथम पटक टेन्डर आह्वान गर्दा न्यूनतम् मूल्य ७ करोड ५७ लाख रुपैयाँ तोकेको थियो । तर, त्यही रकममा दोस्रोपटक टेन्डर आह्वान गर्दासमेत टेन्डर परेन । टेन्डर रकम धेरै भएका कारण व्यवसायीले आवेदन नै नदिएको महानगर कर्मचारीको भनाइ छ ।
यो पनि पढ्नुहोस पोखरामा बहुतले पार्किङ, पातलो छाँगोमा सीसाको पुलतेस्रोपटक टेन्डर आह्वान गर्दा महानगरले पहिले तोकिएको मूल्य घटाएर ५ करोड ३९ लाख रुपैयाँमा कायम ग¥यो । तर त्यसपटक पनि कुनै आवेदन परेन । चौथोपटक टेन्डर सूचना जारी गर्दा पुनः मूल्य घटाएर ३ करोड ५६ लाख रुपैयाँ कायम गरियो । चौथोपटकमा भने ३ वटा कम्पनीले आवेदन दिए, मेन्स बिल्डर्स, अशेष निर्माण सेवा र नाइस नेपाल ।
प्रथमपटक जारी गरिएको टेन्डर सूचनाको करिब आधा रकममा जारी गरिएको चौथोपटकको टेन्डरमा ३ कम्पनीले आवेदन त दिए । तर, ३ वटै कम्पनी महानगरले बोलाएको समयमा कार्यालयमा उपस्थित भएनन् । पोखरा महानगर राजस्व शाखा प्रमुख छविलाल शर्माले नाइस आवेदन आएकामध्ये नाइस नेपाल कम्पनीसँग सम्झौता गर्ने भनिए पनि उपस्थित नभएको बताए ।
‘मेन्स बिल्डर्सले आवेदन दिएर पनि काम गर्न सक्दिनँ भनेको छ । दोस्रो कम्पनी अशेष निर्माण सेवासँग महानगरले पहिल्यै पैसा ल्याउन बाँकी छ,’ शर्माले भने, ‘तेस्रो कम्पनी नाइस नेपालसँग सम्झौता भर्ने भनेका थियौं । तर समयमा उपस्थित भएन ।’ उनले अशेष निर्माण सेवाले अघिल्लो सम्झौताबाटै १ करोड ६१ लाख रुपैयाँ उठाउन बाँकी रहेको जानकारी दिए ।
नाइस कम्पनीले महानगरसँग खरिद ऐन विपरीत माग राखेको कर अधिकृत शिवहरि शर्माले बताए । उनले भने, ‘ऐनमा व्यवस्था भएभन्दा बाहिरको माग राख्दै आएको छ ।’ उनले महानगरको आगामी बैठकमा पार्किङ ठेक्काबारे कुरा राख्ने र त्यसपछिमात्रै त्यसबारे निर्णय लिन सकिने उनले जनाए ।