गोरखाको जंगलभित्र ओढारमा भेटियो १६ किलो सुन

९ साउन, गोरखा । गोरखाको धार्चे गाउँपालिका–३, खोर्लाबेशीमा ओढारमा लुकाएर राखिएको १६ किलो सुन बरामद भएको छ ।

जिल्ला प्रहरी कार्यालय, गोरखाले सुनसहित चुमनुब्री गाउँपालिका हुल्चुकका व्यवसायी धनकमल गुरुङलाई पक्राउ गरेको हो ।

गोरखा प्रहरी प्रमुख उपरीक्षक (एसपी) ओमप्रसाद अधिकारीले ढुंगामुनि लुकाएर राखिएको अवस्थामा १६ वटा सुनको विस्कुट बरामद भएको बताए । उनले भने, ‘उनले काठमाडौंतिर सुन लागेका रहेछन् ।’

प्रहरीका अनुसार खच्चडबाट सामान ओसार्ने काम समेत गर्ने गुरुङले तिब्बतबाट उक्त सुन ल्याएका थिए । ‘तिब्बतको छेकम्पारको ङुइला नाका हुँदै सुन ल्याइएको देखिएको छ’, अधिकारीले भने ।

पैसा लुटिएको सूचनाबाट सुनसम्म

प्रहरीले व्यवसायी गुरुङको साथमा भएको पैसा लुटिएको सूचना पाएपछि अनुसन्धान थालेको थियो । तर, गुरुङ गायब थिए ।

अनुसन्धानका क्रममा देखा परेका वस्तुस्थिति र तथ्यले पैसा लुटिएकोतर्फ संकेत गरेको थिएन । बुधबार काठमाडौंमा पक्राउ परेपछि मात्र गुरुङले पैसा नभइ, सुन लुटिएको दाबी गरेका थिए ।

‘तर, सोधपुछका क्रममा उनी आफैंले ओडारमा सुन लुकाएको खुल्यो’, गोरखाका प्रहरी अधिकृत भन्छन्, ‘उनैले ओडारसम्म प्रहरी टोलीलाई पुर्‍याएका थिए ।’

स्थानीयका अनुसार गोरखा सदरमुकामबाट सुन भेटिएको ठाउँ पुग्न एक दिन लाग्छ । धार्चे गाउँपालिकाको केन्द्र माछाखोलासम्म गाडी चल्ने सडक छ । त्यहाँबाट ३ घन्टामा सुन भेटिएको स्थानमा पुगिन्छ ।

‘ओढारमा ढुंगामुनि झोलाभित्र हाते रुमालले बेरिएको, त्यसभित्र दुई वटा प्लास्टिकले ढाकिएको अवस्थामा सुन भेटिएको थियो’, एसपी अधिकारी भन्छन् । उनका अनुसार बिहीबार साँझ मात्रै सुन जिल्ला प्रहरी कार्यालयसम्म आइपुगेको थियो ।

को हुन् सुन मालिक ?

प्रहरीले सुन र गुरुङलाई पत्रकार सम्मेलन गरेर सार्वजनिक गरे पनि सुन मालिकबारे केही बोलिएको छैन । यद्यपि, स्थानीय व्यापारीको पनि यसमा संलग्नता हुनसक्ने आशंका गरिएको छ ।

‘जिल्ला प्रहरी कार्यालयमा ढिलो मात्र अभियुक्त आइपुगेकाले बयान लिनै बाँकी छ’, एसपी अधिकारीले अनलाइनखबरसँग भने । प्रारम्भिक सोधपुछमा भने गुरुङले त्यो सुन काठमाडौं लान लागिएको बताएका छन् ।

प्रहरीले पैसाको लोभमा उनी आफैंले सुन लुटिएको नाटक गरेको हुनसक्ने आशंका गरेको छ ।

यो पनि पढ्नुहोस

वडाध्यक्षसँगको त्यो संवाद, जसले खोल्यो १६ किलो सुनको पोल

तस्करीको ट्रान्जिट बन्दै ङुइला नाका

गुरुङले सुन भित्र्याएको भनिएको छेकम्पारको ङुइला नाका पछिल्लो समय सुन तस्करी गर्ने ट्रान्जिट बन्दै गएको छ । गत २३ भदौमा पनि सोही नाका हुँदै अवैध रुपमा ल्याइएको १० किलो सुन बरामद भएको थियो ।

छेकम्पार नाकाबाट आरुघाट आउने क्रममा कुनै भन्सार कार्यालय पनि छैन ।