१७ भदौ, काठमाडाैं । लागूऔषध गाँजा सेवन गरेर होटलका कर्मचारीको हत्या प्रयास गरेको आरोपमा तीन जना पक्राउ परेका छन् । पक्राउ पर्नेमा मकवानपुरका विनय वाइबा लामा, गुल्मीका कोसविन अर्याल र रामेछापका निशान धमाला छन् ।
महानगरीय प्रहरी वृत्त, कालिमाटीको टोलीले उनीहरुलाई गएराति पक्राउ गरेको हो ।
कालिमाटीका डीएसपी रुँगम कुँवरका अनुसार पक्राउ परेका ३ जनासहित ५ जना गएराति कलंकीको नारायणी गेष्ट हाउसमा बसेका थिए । राति कोठामा खान पुर्याउन जाँदा होटलका कर्मचारी विवेक सोनाम सुनारसँग विवाद भएको थियो ।
त्यसक्रममा उनीहरूले होटलको दोस्रो तलाबाट सुनारलाई भुइँमा फ्यालेको होटल सञ्चालक नारायण पुडासैनीले प्रहरीलाई दिएको जाहेरीमा उल्लेख गरेका छन् । उनको ट्रमा सेन्टरमा उपचार भइरहेको छ भने अवस्था गम्भिर रहेको चिकित्सकहरुले बताएका छन् ।
घटनापछि भाग्दै गरेका ५ जना मध्ये ३ जनालाई स्युचारटारबाट नियन्त्रणमा लिइएको कुँवरले बताए । संलग्न अन्यको खोजी जारी रहेको उनको भनाइ छ ।
