२०७६ असोज ६ गते ७:४० 
६ असोज, काठमाडौं । घरेलु टोली भारतविरुद्ध दक्षिण अफ्रिकाले तीन खेलको टी–२० क्रिकेट सिरिज बराबरीमा सकाएको छ ।
आइतबार राति सम्पन्न अन्तिम तथा तेस्रो खेलमा दक्षिण अफ्रिकाले भारतलाई ९ विकेटले पराजित गरेसँगै सिरिज १–१ को बराबरीमा सकाएको हो । १३५ रनको सामान्य चुनौती पछ्याउँदै ब्याटिङ गरेको दक्षिण अफ्रिकाले १६.५ ओभरमा एक विकेटको क्षतिमा लक्ष्य भेटायो ।
दक्षिण अफ्रिकाका लागि कप्तान डी कक्ले अविजित ७९ रन बनाए । उनले ५२ बलमा ६ चौका र ५ छक्का प्रहार गरे । त्यस्तै, रिजा हेन्ड्रिक्सले २८ रन बनाउँदा तेम्बा बाभुमाले अविजित २७ रन बनाए ।
यसअघि टस जितेर पहिले ब्याटिङ गरेको भारतले निर्धारित २० ओभरमा ९ विकेटको क्षतिमा १३४ रन बनाएको थियो । भारतका लागि शिखर धवनले ३४ तथा रिषभ पन्त र रवीन्द्र जडेजाले समान १९–१९ रन बनाए ।
बलिङतर्फ दक्षिण अफ्रिकाका कागिसो रबडाले तीन विकेट लिए ।
भारत र दक्षिण अफ्रिकाबीचको टी–२० क्रिकेट सिरिजको पहिलो खेल भने वर्षाको कारण रद्द भएको थियो । दोस्रो खेलमा भने भारतले दक्षिण अफ्रिकालाई सात विकेटले पारजित गरेको थियो ।
प्रतिक्रिया 4