२१ कात्तिक, काठमाडौं । काठमाडौंको बूढानीलकण्ठ नारायण मन्दिरका लागि भारत सरकारको सहयोगमा मठाधीश भवन निर्माण गरिएको छ । २ करोड १८ लाख रुपैयाँ अनुदान सहयोगमा बनाइएको मठाधीश भवनको नेपालका लागि भारतीय राजदूत मंजीवसिंह पुरीले बुधबार उदघाटन गरेका छन् ।
उदघाटन समारोहमा बूढानीलकण्ठ नगरपालिकाका मेयर उद्धव खरेल, जिल्ला समन्वय समितिका अध्यक्ष शिवसुन्दर राज वैद्य लगायत राजनीतिक तथा सामुदायिक अगुवाहरुको सहभागीता थियो ।
नवनिर्मित यस तीनतल्ले भवन मठाधीश तथा युवा भिक्षुहरु बस्न प्रयोग हुने छ । मन्दिर परिसरमा निर्मित यस मठाधीश भवन भारत र नेपालबीचको सदियौं पुरानो सांस्कृतिक सम्बन्धको प्रतीकको रुपमा रहने नेपालस्थित भारतीय दूतावासको विश्वास छ ।
बूढानीलकण्ठ मन्दिर काठमाडौं जिल्लाको उत्तरतर्फ शिवपुरी डाँडाको काखमा अवस्थित छ । यस धार्मिकस्थलको पोखरीको मध्य भागमा नागहरुको शैय्यामा पल्टिरहेको भगवान विष्णुको मूर्ति सम्भवतः नेपालको सबैभन्दा ठूलो प्रस्तर मूर्ति हो । यहाँ दर्शन गर्न भारत तथा विश्वको अन्य स्थानहरुबाट समेत तीर्थयात्रीहरु आउँछन् ।
