१८ मंसिर, काठमाडौं । १३ औं दक्षिण एसियाली खेलकुद (साग) अन्तर्गत १० हजार मिटर दौडमा नेपालका दीपक अधिकारीले कास्य पदक जितेका छन् ।
यस प्रतिस्पर्धामा भारतका सुरेश कुमारले स्वर्ण पदक र श्रीलंकाका स्वरणले रजत पदक जितेका छन् । यससँगै भारतले जितेको स्वर्ण पदकको संख्या १६ पुगेको छ ।
भारतीय खेलाडी सुरेश कुमारले १० हजार मिटर दूरी २९:३३.६१ समयमा पूरा गरे । श्रीलंकाका स्वरणले ३०:४९.२० समयमा निर्धारित दूरी पार गर्दा नेपालका दीपक अधिकारी थोरै समयले चुके । दीपकले निर्धारित दूरी ३०:५०.०६ समयमा पूरा गरेका छन् ।
नेपालले मंगलबारसम्म २३ स्वर्ण, ९ रजत र १२ कास्य पदक जितिसकेको छ । नेपाललाई पछ्याइरहेको भारतले १६ स्वर्ण, १६ रजत र ९ कास्य पदक जितेको छ ।
