२ पुस, वीरगञ्ज । बाराबाट प्रहरीले ८ किलो ५ सय ग्राम अवैध लागूऔषध चरेशसहित एक जना भारतीय नागरिकलाई पक्राउ गरेको छ ।
प्रहरीले भारत बिहार मोतिहारी जिल्ला थाना कुन्दवा चैनपुर ग्राम कोरैया लौखान वडा नं.८ बस्ने ४० वर्षीय गुलाबी प्रसाद कुशवाहालाई पक्राउ गरेको हो ।
विशेष सूचनाको आधारमा अस्थायी प्रहरी चौकी बसपार्क बाराबाट खटिएको प्रहरी टोलीले कुशवालाई नियन्त्रणमा लिएको हो ।
कलैया उपमहानगरपालिका वडा नं.६ स्थित संदिप साहको होटलमा खाना खाई रहेको अवस्थामा कुशवालाई प्रहरीले नियन्त्रणमा लिएको थियो ।
पिँठ्युमा बोक्ने कालो रंगको झोला चेकजाँच गर्दा झोलाभित्र ९ वटा प्याकेटमा ८ किलो ५ सय ग्राम अवैध लागूऔषध चरेश फेला परेको जिल्ला प्रहरी कार्यालय बाराले जनाएको छ ।