काठमाडौं । कप्तान लिओनल मेस्सीले नवौं पटक क्यालेन्डर इयमा ५० गोलको कोसेढुङ्गा पूरा गर्दा बार्सिलोनाले शनिबार स्पानिस ला लिगामा एलाभेजलाई ४–१ ले पराजित गरेको छ । यस जितसँगै बार्सिलोनाले वर्ष २०१९ शीर्ष स्थानमा रहेर अन्त्य गर्ने पक्का भएको छ ।
जितपछि बार्सिलोनाको १८ खेलबाट ३९ अंक भएको छ । दोस्रो स्थानमा रहेको रियल मड्रिडले एथ्लेटिक विल्वाओलाई पराजित गरेपनि बार्सिलोना समान अंक बराबर हुनेछ । तर गोलअन्तरमा बार्सिलोना अगाडि रहनेछ ।
एलेभजविरुद्ध गोल गर्दै ५० गोल पूरा गरेपछि बार्सिलोनाका प्रशिक्षक एरनेस्टो भलभर्डेले मेस्सी टिममा हुनु ठूलो फाइदा रहेको बताए । ‘मेसी हुनु यो एकदमै ठूलो फाइदा हो, उनले जुनसुकै समय जहाँबाट पनि गोल गर्न सक्छन्’, भलभेर्डेले भने ।
३२ वर्षीय मेस्सीले क्लब र देशका लागि गरी पछिल्लो १० मध्ये ९ वर्ष ५० गोल गरेका हुन् ।
क्रिसमस ब्रेकमा जानुअघि मेस्सी ला लिगामा १३ गोलसहित सर्वाधिक गोलकर्तामा अगाडिसमेत रहेका छन् । दोस्रो स्थानमा रहेका रियल मड्रिडका करिम बेन्जामाको १२ गोल रहेको छ ।
बार्सिलोनाको जितमा पहिलो गोल गरेका फ्रेन्च खेलाडी एन्टोनी ग्रीजमनले पनि यस गोलले आफ्नो होलिडे रमाइलो हुने बताए ।
‘होलिडे अगाडि मैले गोल गर्नुपर्ने आवश्यकता थियो, अब म खुशीका साथ होलिडे जान सक्छु’, यसै सिजन क्याटलान क्लब भित्रिएका ग्रिजमनले सातौँ गोल गरेपछि उनले भने, ‘उत्कृष्ट खेलाडीहरू सहित हाम्रो उत्कृष्ट टिम छ र हामी कुनै बेला चलेनौँ भने त्यहाँ सधैँ मेसी हुनेछन् ।’
बार्सिलोनाले ब्रेकपछि नयाँ वर्षको पहिलो खेल २०२० जनवरी ४ मा क्याटलाना प्रतिद्वन्द्वी स्पानयोसँग खेल्नेछ ।
उता रियल मड्रिडका प्रशिक्षक जिनेदिन जिदानले यस सिजन ला लिगको उपाधि जित्नलाई बार्सिलोनासँग प्रतिस्पर्धा गर्ने बताएका छन् । रियलले आइतबार एथ्लेटिक विल्वाओसँग खेल्दैछ ।
‘विल्वाओ फरक क्षमताको अर्को प्रतिद्वन्द्वी हो । हामी आफ्नो शक्तिका साथ उनीहरुसँग खेल्नेछौं, यो वर्षको अन्तिम खेल हो’, जिदानले भने, ‘लिग हाम्रो प्राथमिकता हो र हामी यसका लागि सिजनभर फाइट गर्छौं ।’
