१४ पुस, काठमाडौं । डीएभी सुशील केडिया विश्व भारती उच्च माद्यामिक विद्यालयको दोस्रो दीक्षान्त समारोह शनिबार सम्पन्न भएको छ । आफ्नो कलेजबाट बीबीए र बीबीएस अध्ययन सकेका विद्यार्थीलाई दीक्षित गर्दै कलेजले उत्कृष्ट भएका विद्यार्थीलाई सम्मान समेत गरेको हो ।
कलेजका अध्यक्ष अनिल केडियाको सभापतित्वमा भएको समारोहमा स्याकार कम्पनीका अध्यक्ष एवं ज्योती ग्रुपका सौरभ ज्योतीले अध्ययनकालका आफ्ना अनुभव सुनाउदै विद्यार्थीलाई उत्प्रेरणा दिने मन्तव्य राखे ।
उनले नेपालको भविष्य विद्यार्थी र युवाहरुको काँधमा भएको बताउदै देशमा धेरै कुराहरुको सम्भावना रहेको धारणा राखे ।
डीएभी कलेजबाट पढेर दक्ष हुन पाउनु भाग्यको कुरा भएको बताउँदै ज्योतीले पढाई मात्र सबैभन्दा महत्वपूर्ण नभएर यो संगै सीप र व्यवहारिक ज्ञान पनि एकदम महत्वपूर्ण भएको बताए ।
आफूले पनि भारतको बैंगलोरमा अध्ययन गरेको सुनाउँदै अध्ययनकालको समयमा आफूले महसुस गरेका कुराहरू विद्यार्थीले बुझ्ने गरेर कथाहरु मार्फत प्रस्तुत गरे ।
यस्तै द्वन्दकालको बीचमा नेपालमा केहि गर्ने सोचका साथ देश फर्किएको बताउँदै अहिले त देशमा हरेक क्षेत्रमा सम्भावना भएको र त्यति नै चुनौती समेत भएकाले देशमै केही गर्न विद्यार्थीहरुलाई सुझाव दिए ।
कलेजका अध्यक्ष केडिया र ज्योतीले उद्घाटन गरेको समारोहमा कलेजका कार्यक्रम संयोजक रोजिस शाक्यको स्वागत गरे ।
कार्यक्रममा उक्त कलेजका प्रोफेसर डा. मनोजकुमार चौधरी र ललितपुर उद्योग वाणिज्य संघका अध्यक्ष कृष्ण्लाल महर्जनले शुभकामना मन्तव्य राखे ।
कलेजका बीबीए तर्फका ६४ र बीबीएस तर्फका ३९ जना गरी १०३ जना विद्यार्थी दीक्षित भएका थिए । उक्त समारोहकै क्रममा कलेज टपर हुन सफल बीबीए तर्फकी विद्यार्थी प्रिया सुनुवारलाई गोल्ड मेडल र बीबीएस तर्फकी विद्यार्थी कल्यानी कुँवरलाई शैक्षिक उत्कृष्टता अवार्डले सम्मान गरिएको थियो ।
त्यस्तै उनीहरु दुवै जनाले आ-आफ्नो अनुभव सुनाउँदै मन्तव्य राखेका थिए । समारोहका बीच दीक्षित विद्यार्थी र अतिथिहरुलाई मायाको चिनो सहित सम्मान गरिएको थियो ।
