१६ पुस, काठमाडौं । अंग्रेजी नयाँ वर्ष सन् २०२० आजबाट सुरु भएको छ । नेपालीहरुले पनि एकअर्कालाई शुभकामना साटासाट गर्दै मनाइरहेका छन् ।
हुन त नेपालीहरुको नयाँ वर्ष वैशाख १ गते हो । तर जनवरी १ तारिखलाई पनि नेपालीहरुले उत्तिकै उल्लासका साथ नयाँ वर्षको रुपमा मनाउँदै आएका छन् ।
नयाँ वर्षको दिन र नयाँ वर्षको अघिल्लो दिन (न्यू इयर इभ)मा विशेष कार्यक्रम आयोजना गरिन्छ । न्यू इयर इभमा काठमाडौंको ठमेलमा आयोजना गरिएको कन्सर्टमा काठमाडौंबासी मज्जाले झुमे । बच्चादेखि प्रौढसम्म सांगीतिक कार्यक्रममा रमाए ।
यस्ता कार्यक्रमहरुमा नेपालीहरुको सहभागीता र हर्ष हेर्दा लाग्छ यो हाम्रो परम्परागत सँस्कृति नै बनिसकेको छ । त्यसैले आयोजकले पनि कार्यक्रमका सहभागीहरुलाई भरपूर मनोरञ्जन प्रदान गर्न कुनै कसर बाँकी राख्दैनन् ।
