२५ पुस, काठमाडौं । पर्साको ठोरीमा प्रथम हात्ती तथा जीप सफारी महोत्सव शुक्रबारदेखि सुरु भएको छ ।
‘सुशासनयुक्त सक्षम एवं सबल स्थानीय सरकार, पूर्वाधार निर्माण, कृषि, पर्यटन र सशक्तिकरण ठोरीको प्रमुख आधार’ भन्ने मुल नारासहित ठोरी गाउँपालिका ५ सुवर्णपुरको गढवाललाइनमा महोत्सव सुरु भएको हो ।
महोत्सवको उद्घाटन नेपाल कम्युनिस्ट पार्टी (नेकपा)का केन्द्रीय सदस्य नागेन्द्र चौधरीले आँपको विरुवा रोपेर गरेका थिए ।
नेकपा प्रदेश २ का सहइन्चार्ज समेत रहेका चौधरीले ठोरी पर्यटकीय रुपमा धनी रहेको भन्दै यसको विकास र प्रवर्द्धनका लागि राज्यको ध्यान जानुपर्ने बताए । ठोरीले पर्यटन प्रवर्द्धनका लागि गरेको यसप्रकारको कार्यक्रमबाट सबै स्थानीय तहले अनुशरण गर्नुपर्ने उनको भनाइ थियो ।
पर्सा राष्ट्रिय निकुञ्जका प्रमुख संरक्षण अधिकृत अमिर महर्जनले पर्यटन वर्षलाई मध्य नजर गर्दै निकुञ्जभित्र विभिन्न आकर्षकयुक्त गतिविधि संचालन गरी पर्यटकहरुलाई मनोरञ्जन प्रदान गर्न निकुञ्ज तत्पर रहेको बताए ।
ठोरी गाउँपालिकाका अध्यक्ष पदमलाल श्रेष्ठले भ्रमण वर्ष २०२० सफल बनाउन आयोजना गरिएको महोत्सवले ठोरीलाई पनि पर्यटकीय स्थलको रुपमा चिनाउन सहयोग पुग्ने बताए । पर्साको पर्यटकीय स्थल ठोरी घुम्नका लागि हात्ती र जीप सफारीको व्यवस्था गरिएको उनले बताए । पर्सा राष्ट्रिय निकुञ्जसँगको समन्वयमा निकुञ्जभित्र हात्ती र जीप सफारीको व्यवस्था गरिएको उनले बताए ।
पुस २९ गतेसम्म सञ्चालन हुने महोत्सवमा हात्ती तथा जीप सफारीका साथै अन्य विविध मनोरञ्जनात्मक कार्यक्रम सञ्चालन हुने अध्यक्ष श्रेष्ठले बताए ।
‘वनस्पति, जंगल, जीवजन्तु छ, सुन्दर, शान्त ठाउँ छ । बस्नका लागि होमस्टे छ । घुम्नका लागि पर्सा राष्ट्रिय निकुञ्ज छ,’ श्रेष्ठले भने, ‘ठोरीको सुवर्णपुर र तीनघरेमा होम स्टे सञ्चालनमा छन् । अर्गानिक अनि सस्तोमा खाना खान पाइन्छ ।’
दैनिक १० हजार जनाले महोत्सवको अवलोकन गर्ने अनुमान आयोजकले गरेको छ ।
निकुञ्जले नै हात्ती सफारीका लागि नेपालीको ६ सय रुपैयाँ र विदेशीलाई ११ सय रुपैयाँ शुल्क कायम गरिदिएको छ ।
