१२ फागुन, काठमाडौं । पर्साको जिराभवानी गाउँपालिका-५ हरैयामा आगलागी भएको छ । आगलागीबाट एउटा घर र गोठ जलेर क्षति भएको छ ।
आगलागीबाट स्थानीय सुरेन्द्र भण्डारीको घर र अमिना चौधरीको गोठमा क्षति पुगेको पर्सा प्रहरीले जनाएको छ ।
चौधरीको गोठमा लामखुट्टे धपाउन बालेको घुरबाट सल्किएको आगोले उनको गोठसँगै भण्डारीको खपडाको घरसमेत जलेर क्षति पुगेको हो ।
आगलागीबाट अन्नपात, लताकपडा तथा भाँडाकुँडा गरी दुबै जनाको अन्दाजी ३ लाखको क्षति पुगेको अनुमान प्रहरीले गरेको छ ।
सोमबार बिहान ४ बजेको समयमा लागेको आगो प्रहरी र स्थानीयको सक्रियतामा बिहान साढे ४ बजे नियन्त्रणमा लिइएको थियो ।
