अनसन तोड्न माडीका वडाध्यक्षलाई नौ राजनीतिक दलको आग्रह

१२ फागुन, चितवन । निकुञ्ज ऐन संशोधनको माग राखी आमरण अनसनमा बसेका माडी नगरपालिका १ का वडाध्यक्ष कृष्णप्रसाद पौडेललाई अनसन तोड्न चितवनका नौ राजनीतिक दलले आग्रह गरेका छन् ।

जिल्लाका नौ राजनीतिक दलहरुले पौडेलका मागहरुप्रति एकबद्धता जनाउँदै अनसन तोड्न आग्रह गरेका हुन् ।

माडी क्षेत्रका विभिन्न समस्या समाधानको माग गर्दै वडाध्यक्ष पौडेल गत फागुन ७ गतेदेखि अनसनमा छन् । नेकपा, नेपाली कांग्रेस, राप्रपा संयूक्त, समाजवादी पार्टी, राष्ट्रिय जनता पार्टी, साझा पार्टी, राप्रपा, राष्ट्रिय जनमोर्चा र राष्ट्रिय नागरिक पार्टीले पौडेलका मागहरुप्रति ऐक्यबद्धता जनाउँदै अविलम्व पूरा गर्न माग गरेका छन् ।

उनको जीवन रक्षाका लागि सरकारसँग पनि अनुरोध गरेका छन् । सोमबार जिल्ला प्रशासन कार्यालयमा प्रमुख जिल्ला अधिकारी नारायणप्रसाद भट्टराईको रोहवरमा जिल्लाका नौ दलहरुको बैठक बसेको थियो ।

पौडेलको स्वास्थ्य अवस्था नाजुग बन्दै गएको चिकित्सकहरुले बताएका छन् । पौडेललाई भरतपुर अस्पतालको सघन उपचार कक्षमा राखिएको छ । भरतपुर अस्पतालमा राखिएका पौडेललाई भरतपुर महानगरपालिका प्रमुख रेनु दाहाल र प्रदेश सभा सांसद विजय सुवेदीले भेट गरेका छन् । उनीहरुले पौडेलको स्वास्थ्य अवस्थाका बारेमा जानकारी लिदैं अनसन तोड्न आग्रह गरेका थिए ।

यसैबीच, माडी नगरपालिका प्रमुख ठाकुरप्रसाद ढकालले निकुञ्जका कारण माडीका जनताले भोग्दै आएका समस्याको समाधान गर्न सरकारसँग लविङ गरिरहेको बताएका छन् ।

चितवन निर्वाचन क्षेत्र नं. ३ का सांसद एवम् नेकपाका अध्यक्ष पुष्पकमल दाहाल प्रचण्डसहित प्रधानमन्त्रीसँग यस बारेमा गम्भीर छलफल भइरहेको नगर प्रमुख ढकालले बताए ।

‘म आफैं अनसनमा बस्छु भनेर कस्सिएको थिएँ, पूर्व प्रधानमन्त्री र प्रधानमन्त्रीले समस्याको समाधान गर्छु भनेपछि काठमाडौं आएको हो’ नगर प्रमुख ढकालले भने, ‘समस्याको समाधान हुने सरकारबाट नै हो, सरकारले आउनुस् भने बोलाए पछि आएँ, अनसन बस्न आवश्यक ठानिनँ ।’