१४ फागुन, काठमाडौं । बुधबार सेयर बजारमा हरियाली छाएको छ । दिनभर भएको तीब्र उतारचढावबीच सेयर कारोबार मापक नेप्से परिसूचक बुधबार ५० दशमलव ९३ अंकले बढेर १ हजार ५ सय ९६ दशमलव १३ मा पुगेको छ ।
बुधबारको तुलनामा नेप्से परिसूचक ३ दशमलव ३० अंकले बढेको हो । कारोबार रकममा समेत उल्लास देखिएको छ । ४ अर्ब भन्दा बढीको कारोबार भएर नेप्सेमा सेयर कारोबार रकमले रेकर्ड नै ब्रेक समेत गरेको छ ।
यो पनि पढ्नुहोस
सेयर बजारमा एकैदिन तीन नयाँ कीर्तिमान
कारोबार रकममा मात्रै कारोबार संख्यामा समेत नेप्सेले रेकर्ड ब्रेक गरेको छ । दिनभर भएका ३२ हजार १ सय ५४ कारोबारबाट ९९ लाख ६ हजार ९ सय ८९ कित्ता सेयर किनबेच भएका छन् ।
जसअनुसार कारोबार रकम ४ अर्ब १५ करोड ४८ लाख ८३ हजार ९२ रुपैयाँ पुगेको नेपाल स्टक एक्सचेञ्जले जनाएको छ । यस अघि गत आइतबार कारोबार रकम, कारोबार संख्या र किनबेच भएको सेयरको संख्यामा नेपालको पुँजी बजारको इतिहासमै नयाँ रेकर्ड कामय भएको थियाे ।
त्यसदिन ३० हजार ४ सय ५६ कारोबारबाट कूल १७८ कम्पनीको ८७ लाख ६९ हजार ५२२ कित्ता सेयर किनबेच भएको थियाे । सेयर काराेबार रकममा समेत नयाँ रेकर्ड कायम भएकाे छ ।
गत आइतबार तीन अर्ब ६० करोड ८५ लाख २६ हजार ३५४ रुपैयाँको सेयर कारोबार भएर नयाँ किर्तिमान कायम भएको थियाे ।
बुधबार ४ अर्ब १५ करोड ४८ लाख ८३ हजार ९२ रुपैयाँकाे काराेबार भएर नयाँ रेकर्ड कायम भएकाे हाे ।
कारोबार रकमका आधारमा आज नेपाल लाइफ इन्स्यारेन्स कम्पनी पहिलो नम्बरमा देखिएको छ । नेपाल लाइफकोमात्रै करिब २२ करोड रुपैयाँ बराबरको सेयर किनेबेच भएका छन् ।
१८ करोड ४९ लाख रुपैयाँ भन्दा बढीको कारोबार गर्दै शिवम् सिमेन्ट दोस्रो नम्बरमा देखिएको छ भने करिब १८ करोड रुपैयाँको सेयर कारोबार भएर नेपाल बैंक तेस्रो नम्बरमा देखिएको छ ।
