२७ फागुन, काठमाडौं । नेपाली क्रिकेटका ग्लोबल स्टार सन्दीप लामिछानेले लामो समयपछि राष्ट्रिय टिमका पूर्वप्रशिक्षक पुबुदु दासानायकेसंग भेट्दा पुराना दिन याद आएको बताएका छन् ।
सन्दीपलाई राष्ट्रिय टिमसम्म ल्याउने काम गरेका पुबुदु अहिले नेपालमा छन् । पुबुदले करिब ५ वर्ष नेपाली टिमको प्रशिक्षकको जिम्मेवारी सम्हालेका थिए । उनकै पालामा नेपालले क्रिकेटमा सफलताको सिँढी चढेको थियो ।
पुबुदुको बहिर्गमनपछि सन्दीप नेपाली टिमको नयाँ राइजिङ स्टार बने । एभरेष्ट प्रिमियर लिग टी २० क्रिकेटमा भैरहवा ग्लाडिएटर्सको प्रशिक्षक बनेर पुबुदु यस पटक नेपाल आएका बेला सन्दीपले भेट्न पाएका हुन् । यद्यपि प्रतियोगिता भने स्थगित भइसकेको छ ।
Spent some quality time at nets with my mentor today and felt as if I have went back in time: The joy, love and thrill. I am privileged and humbled Sir @PDassnayake. You always encouraged me from day one. Thanks again for everything legend. #Respect #SL25 pic.twitter.com/mKjosK2Abd
— Sandeep Lamichhane (@IamSandeep25) March 10, 2020
यही फुर्सदको समयमा मंगलबार पुबुदुले कीर्तिपुरस्थित टीयू क्रिकेट मैदानमा नेपाली खेलाडीसँग भेट गरेका थिए । सन्दीपले त्यही भेटको फोटो सामाजिक सञ्जालमा पोष्ट गर्दै महत्वपूर्ण समय बिताउने अवसर पाएको बताएका छन् ।
सन्दीपले पुबुदुलाई भेट्दा आफू पुरानै दिनमा पुगेजस्तो महसुस भएको उल्लेख गरेका छन् ।
चितवनको क्याम्पाचौरमा ट्रेनिङ गरिरहेको ठाउँबाट पुबुदुले सन्दीपलाई राष्ट्रिय टिमको क्याम्पसम्म ल्याएका थिए । त्यसपछि सन्दीपले यू १९ विश्वकप खेले । त्यसपछि के भयो सबै छर्लङ्ग छ ।
सन्दीपले भर्खरै थांइल्याण्डमा भएको एसीसी इस्टर्न रिजनमा पहिलो खेलमा मलेसिया विरुद्ध विकेट लिँदै टी २० मा १०० विकेट पुर्याइसकेका छन् । उनले सन् २०१६ मा नेपालको नेपालको राष्ट्रिय टिमका लागि डेब्यु गरेका थिए । यस्तै २०१८ मा टी २० र ओडीआईमा डेब्यु गरेका थिए । सन्दीपले विश्वका लगभग सबै टी२० फ्रेन्चाइज लिग खेलिसकेका छन् ।
सन्दीपले नेपालको लागि ओडीआईमा २३ र टी२० मा ३४ विकेट लिइसकेका छन् ।
