१९ चैत, काठमाडौं । नेपाल ग्यास उद्योगले बुधबारदेखि काठमाडौंका ६ स्थानबाट ग्यास वितरण गर्दैछ । लकडाउनका कारण ग्यास अभाव भएको गुनासो आएपछि बालाजु औद्योगिक क्षेत्रबाहेक नयाँ क्षेत्रमा ग्यास वितरण गर्न लागिएको हो ।
नेपाल ग्यास कम्पनीका कार्यकारी निर्देशक गोकुल भण्डारीका अनुसार बुधबार बिहान १० बजे सुरक्षाकर्मीका साथमा चाबहिल चोक र बाफल चोक, बिहीबार कोटेश्वर चोक र बानियाँटार चोक तथा शुक्रबार भनिमण्डल चोक र महाराजगञ्ज चोकवाट ग्यास सिलिण्डर वितरण गरिनेछ ।
भण्डारीले उपभोक्ताको गुनासोअनुसार अतिरिक्त रुपमा आधा दर्जन स्थानमा तीन दिनसम्म ग्यास वितरण गर्न लागिएको जानकारी दिए । उनका अनुसार काठमाडौँ उपत्यकाका ६ स्थानमा मिलाएर तीन दिनसम्म ग्यास वितरण गरिनेछ ।
‘यस परिस्थितिमा अति आवश्यक रहेका तथा तोकिएका बिक्री केन्द्रमा जान नसकेका उपभोक्तालाई ध्यानमा राखी हामीले ग्यास वितरण गर्न लागेका हौँ’, उनले भने, ‘तीन दिनमा दुई-दुई स्थानबाट एकैचोटि ग्यास वितरण गर्नैछौँ, दुई स्थानमा हामीले ५६० वटासम्म सिलिण्डर वितरणको तयारी गरेका छौँ ।’
सरकारले ग्यासको सट्टा विद्युतीय चुह्लो प्रयोग गर्दा सस्तो पर्ने भन्दै उपभोक्तालाई विद्युतीय चुल्हो प्रयोग गर्न आग्रह गर्दै आएको छ । विद्युतीय चुह्लो प्रयोग गर्न प्रोत्साहन गर्ने उद्देश्यले नेपाल विद्युत प्राधिकरणले विद्युत महसुलमा छुट पनि दिएको छ । तर, उपभोक्ताहरुमा ग्यास सिलिण्डरको मोह घटेको छैन । काठमाडौं उपत्यकाका ग्यास बिक्री केन्द्रहरुमा उपभोक्ताहरुको लामो लाइन देखिन्छ ।
