३ बैशाख, डोटी । जिल्ला कारागार, डोटीका कैदीबन्दीहरूले सरकारले स्थापना गरेको कोरोना सहयोग कोषलाई सहयोग गरेका छन् ।
कारागारमा रहेका तीन महिलासहित ४९ कैदीबन्दीहरूले कोरोनाविरुद्धको लडाइँमा ऐक्यवद्धता जनाउँदै कोरोना कोषमा १० हजार ९५ रुपैयाँ प्रदान गरेका हुन् ।
बुधबार उनीहरूले उक्त सहयोग रकम डोटीका प्रमुख जिल्ला अधिकारी टेकनारायण पौडेललाई हस्तान्तरण गरे ।
कैदीबन्दीहरूले एक दिनको सिदा बराबर पाउने रकम सहयोग गरेको कारागारका चौकीदार दीपेन्द्र जेठाराले जानकारी दिए । उनले भने, ‘मुलुक संकटमा परेका बेला हामीहरूले पनि केही सहयोग गर्नुपर्छ भनेर छलफल गर्यौँ, सबै साथीहरू सहमत हुनुभयो र एक दिनको सिदा बराबरको रकम जम्मा गर्यौँ,’ सहयोगबारे जानकारी दिँदै जेठारले भने ।
सहयोग रकम बुझ्दै प्रमुख जिल्ला अधिकारी पौडेलले कैदीबन्दीहरूलाई धन्यवाद दिए । उनले कैदीबन्दीबाट प्राप्त सहयोग रकम बुधबार नै नेपाल सरकारले स्थापना गरेको कोषमा जम्मा गरिने जानकारी पनि दिएका छन्।
