१० वैशाख, काठमाडौं । नेपाल एयरलाइन्सले दोस्रो पटक स्वदेशी तथा विदेशी पाइलटले पाउँदै आएको तलब कटौती गरेको छ । एयरलाइन्सले विदेशी पाइलटको ५० प्रतिशत र करारमा नियुक्त नेपाली पाइलटको ३३ प्रतिशत तलब कटौती गर्ने निर्णय गरेको हो ।
लकडाउन सुरु भएलगत्तै नेपाल एयरलाइन्सले करारमा नियुक्त विदेशी पाइलटलाई दुई साता र नेपाली पाइलटलाई १० दिन बेतलबी बिदा दिएको थियो । नेपाल एयरलाइन्सले करारमा कार्यरत एक सय ६६ जना एयर होस्टेजलाई समेत १० दिन बेतलबी बिदा दिएको थियो ।
तर, लकडाउन र अन्तराष्ट्रिय उडान-अवतरण तत्काल खुल्ने सम्भावना कम भएसँगै कम्पनीले तलब कटौतीको दोस्रो निर्णय गरेको हो ।
नेपाल एयरलाइन्सकी प्रवक्ता अर्चना खड्काका अनुसार यस पटक आइतबार तलब कटौती सम्बन्धी नयाँ निर्णय भएको छ । जसअनुसार विदेशी पाइलटको हकमा ५० प्रतिशत तलब कटौती भएको छ । ‘लकडाउन तत्काल नखुल्ने भएपछि हामीले बढी तलब बुझ्ने कर्मचारीको तलबलाई तत्काल कतौती गर्ने निर्णय गरेका हौँ,’ उनले भनिन् ।
नेपाल एयरलाइन्समा कुल १५ जना विदेशी पाइलट छन् । जसमध्ये दुई जना एयरबस ३२० न्यारोबडी उडाउने पाइलट हुन् । १३ जनाले भने वाइडबडी ए ३३० जहाज उडाउँछन् ।
नेपाली पाइलटको ३३ प्रतिशत तलब कटौती
करारमा नियुक्त नेपाली पाइलटको भने तलब ३३ प्रतिशत कटौती हुने भएको छ । नेपाल एयरलाइन्सले आधारभूत तलबमा कटौती गर्नेछ । जसअनुसार आधारभूत तलब मासिक १० हजार डलरभन्दा माथि पुग्ने विदेशी पाइलटको तलब ५० प्रतिशत र १० हजार डलरभन्दा कम तलब बुझ्ने पाइलटको तलब ४० प्रतिशत घट्ने भएको छ ।
नेपाली पाइलटको भने सबैको समान ३३ प्रतिशत तलब कटौतीको निर्णय नेपाल एयरलाइन्सले गरेको हो । अन्तर्राष्ट्रिय उडान प्रतिबन्ध अगाडि नै विदेशमा गएर उतै अड्किएका पाइलटको हकमा भने ६६ प्रतिशत तलब कटौती भएको छ । उनीहरूले एक तिहाइ मात्र तलब बुझ्ने छन् । एयर होस्टेसको हकमा समेत सोही नियम लागु हुने नेपाल एयरलाइन्स स्रोतले जानकारी दिएको छ ।
तलब कटौतीको निर्णय तीन महिनासम्मलाई
आइतबार निर्णय भएको तलब कटौतीको निर्णय तीन महिनाका लागि हो । त्यतिन्जेल अवस्था सामान्य हुने अपेक्षा छ । त्यसपछि अवस्था हेरेर अर्को निर्णय हुने बताइएको छ । तर, लकडाउन तथा उडान प्रतिबन्ध खुल्नासाथ एकै पटक ठूलो संख्यामा यात्रुको चाप बढ्ने भन्दै आफ्ना सबै क्याबिन क्रुलाई सेवामा तयार रहन समेत नेपाल एयरलाइन्सले आग्रह गरेको छ । किनकी अहिले लाखौं नेपाली खाडी क्षेत्रबाट घर आउने पर्खाइमा छन् ।
उडान प्रतिबन्ध कहिलेसम्म लम्बिन्छ वा कहिले खुल्छ भन्ने सुनिश्चित नभएका कारण नेपाल एयरलाइन्स तत्काल कर्मचारी कटौतीको पक्षमा भने छैन । ‘आज हामीले कसैलाई सेवाबाट निकाल्यौ र अर्को सातामै लकडाउन खुल्यो भने सेवा हाम्रै रोकिने हो,’ निगमका एक अधिकारीले भने, ‘त्यसकारण खर्च जोगाउने उपायस्वरुप तलब कटौती गरेका हौँ ।’
