१४ वैशाख, काठमाडौं । समाजवादी पार्टी र राष्ट्रिय जनता पार्टी मिलेर बनेको जनता समाजवादी पार्टीको दल दर्ता रोकी पाउँ भन्दै सत्तारुढ नेकपा निकट युवा संघका कार्यकर्ताले निर्वाचन आयोगमा उजुरी गरेका छन् ।
सत्तारुढ नेकपा निकट राष्ट्रिय युवासंघका नेता अमित लामाले आइतबार निर्वाचन आयोगमा पुगेर राष्ट्रिय अखण्डता र परराष्ट्र सम्बन्धमा आँच आउने भन्दै जसपा दल दर्ताको निवेदन स्वीकार नगर्न उजुरी दिएका हुन् ।
जसपाले दल दर्ताका लागि दिएको निवेदनमा नेपाल बहुराष्ट्रिय राज्य कायम गर्ने भनेको र सो कुरा मुलुकको संविधान तथा राष्ट्रिय अखण्डताको विपरीत रहेको निवेदनमा उल्लेख छ ।
संविधानको मर्म र भावना विपरीत छुट्दै देशको अर्थ झल्किने गरी दल दर्ताको प्रस्ताव गरिएकोले संविधानको धारा २६९ विपरीत रहेको सो दल दर्ता प्रक्रिया रोक्न निवेदनमा माग गरिएको छ ।
त्यस्तै प्रस्तावित दल जसपाले प्रस्ताव गरेको झण्डा अफ्रिकी मुलुक बुर्किना फासोको राष्ट्रिय झण्डासँग मेल खाएकाले परराष्ट्र सम्बन्धमा प्रतिकूल असर गर्ने र संयुक्त राष्ट्रसंघको बडापत्र विपरीत भएकाले त्यस आधारमा समेत दल दर्ता रोक्न माग गरिएको छ ।
युवासंघका केन्द्रीय सदस्य अमित लामा र अधिवक्ता विपिन ढकालको उजुरी दर्ता गर्ने क्रममा संघका केन्द्रीय सहसंयोजक रमेश पौडेल पनि निर्वाचन आयोगमा पुगेका थिए ।
यसअघि प्रधानमन्त्री ओलीको निर्देशनमा समाजवादी पार्टी फुटाउनका लागि अध्यादेश ल्याएर ८ जना सांसद जुटाउने अभियान अघि बढाइएको थियो । सो अभियान असफल भएपछि राजपा र समाजवादी पार्टीवीच एकता भई आयोगमा दल दर्ताका लागि निवेदन परेको थियो ।
पार्टी फुटाउने सरकारी अभियान असफल भएपछि सत्तारुढ युवा संघका नेताहरु यस्तो उजुरी लिएर आयोगमा पुगेका हुन् ।
