१ जेठ, विराटनगर । कोरोना भाइरस (कोभिड–१९) बाट संक्रमित भएका थप एक जना निको भएका छन् ।
कोशी अस्पताल कोभिड १९ उपचार केन्द्रमा उपचाररत २५ वर्षीय जमाती महम्मद अदुबकर सुल्तान निको भएर डिस्चार्ज भएका हुन् । यससँगै प्रदेश १ मा निको हुनेको संख्या १७ पुगेको छ ।
५ वैशाखमा उदयपुरको त्रियुगा नगरपालिका– ३ भुल्केमा उनीसहित १२ जनामा कोरोना संक्रमण पुष्टि भएको थियो ।
२७ दिनको उपचारपछि डिस्चार्ज भएका उनलाई रानी मरकजको क्वारेन्टाइनमा राखिएको स्वास्थ्य कार्यालय मोरङका प्रमुख तथा कोभिड अस्पताल व्यवस्थापन संयोजक ज्ञानबहादुर वस्नेतले जानकारी दिए ।
अस्पतालमा अब १८ जना उपचाररत रहेका छन् । सबैको अवस्था सामान्य छ ।
