८ जेठ, बुटवल । .कोरोना संक्रमित बिरामी बढ्दै गएपछि प्रदेश ५ सरकारले थप २ सय ५० आइसोलेसन बेड बनाउने निर्णय गरेको छ । मन्त्रिपरिषदको बिहीबार बसेको वैठकले तराईका जिल्लामा २ सय र पहाडी जिल्लामा ५० बेडको आइसोलेसन बेड तयार पार्ने निर्णय गरेको हो ।
पीसीआर परीक्षणमा पोजेटिभ देखिएका र कोभिड १९ को लक्षण देखिएका बिरामीलाई राखिने आइसोलेसन केन्द्र बनाउन प्रदेश कोभिड कोषबाट रकम दिने वैठकले निर्णय गरेको मुख्यमन्त्रीका प्रेस सल्लाहकार शेरबहादुर केसीले बताए ।
बैठकले प्रदेश सरकारको नीति तथा कार्यक्रम जेठ १० गते ३ बजे प्रदेशसभामा प्रस्तुत गर्न प्रदेश प्रमुखलाई अनुरोध गर्ने र जेठ १५ गते गणतन्त्र दिवसमा दिपावली गर्ने निर्णय समेत गरेको छ ।
वैठकले प्रदेश सभामा प्रमुख विपक्षी दल कांग्रेस संसदीय दलका नेता बलदेव शर्मा पोखरेलको निधन भएकोमा उनले पाउनुपर्ने बीमा बापतको १० लाख रुपैयाँ प्रदान गर्ने निर्णय समेत गरेको छ ।
