१४ जेठ काठमाडौं । श्रीलंकन फास्ट बलर शेन मदुसनका निलम्बनमा परेका छन् । श्रीलंका क्रिकेटले मदुसनकालाई सबै खाले क्रिकेटमा निलम्बन गरेको छ ।
लागूऔषध हिरोइनसहित प्रकाउ परेपछि उनलाई निलम्बन गरिएको श्रीलंका क्रिकेटले जनाएको छ ।
प्रहरीका अनुसार २५ वर्षीय मदुसनकालाई शनिवार २.७ ग्राम हेरोइनसहित प्रकाउ गरिएको थियो । उनी प्रहरी हिरासतमा छन् ।
श्रीलंका क्रिकेटले निलम्बन तत्कालै शुरु हुने र थप अनुसन्धान नहुँदासम्म काय रहने जनाएको छ ।
सन् २०१८ मा श्रीलंकाका लागि डेब्यु गरेका मदुसनकाले ओडीआई डेब्यु खेलमै बंगलादेशविरुद्ध ह्याट्रिक विकेट लिएका थिए । त्यही टुरमा उनले दुई टी२० अन्तर्राष्ट्रिय पनि खेलेका थिए ।
त्यसयता भने उनी चोटका कारण टिमबाट बाहिर थिए ।
