‘माइत गएकी थिएँ, म्यानमारमै थुनिएँ’

२३, काठमाडौं । काँडाघारी, काठमाडौंकी ५३ वर्षीया लक्ष्मी जोशी केही महिनाअघि माइत गएकी थिइन् । उनको माइतीघर म्यानमारको रंगुनमा छ । तर, आमाको न्यास्रो लागेर त्यहाँ पुगेकी उनी लकडाउनका कारण घर फर्कन सकिनन् ।

शुक्रबार म्यानमारबाट काठमाडौं आइपुगेको विमानमा रहेका २५ नेपालीहरुमा लक्ष्मी पनि एक हुन् । कोरोना महामारीका कारण विदेशमा अलपत्र परेका २६ जना नेपालीहरु शुक्रबार नेपाल आइपुगेका छन् ।

म्यानमारको राजधानी याङ्गुनस्थित नेपाली दूतावासका अनुसार नेपाल सरकारको स्वदेश फर्काउनेसम्बन्धी आदेशबमोजिम म्यानमार सरकारकै खर्चमा २६ नेपालीलाई स्वदेश फर्काइएको हो ।

घर फर्कन पाउँदा आफू ढुक्क भएको लक्ष्मीले अनलाइनखबरलाई सुनाइन् । ‘सबै परिवार नेपालै छन्, आफू तीन महिनादेखि उतै अड्किएँ, मन बेस्सरी पोल्यो’ जोशीले भनिन्, ‘अब पारिवारिक मिलन हुन्छ, मन ढुक्क भएको छ ।’

यो पनि पढ्नुहोस

म्यानमारबाट फर्केका नेपाली भन्छन् : काठमाडौं उत्रिनासाथ धर्तीलाई ढोगेँ

नेपाल फर्कने समन्वयका लागि म्यानमारमा रहेको नेपाली दूतावासले राम्रो सहयोग गरेको लक्ष्मीले बताइन् । फर्कँदा खाना र अन्य सुविधामा म्यानमार सरकारले पनि निकै राम्रो व्यवस्था गरेको उनको भनाइ छ ।

त्रिभुवन विमानस्थलबाट नेपाली सेनाले बसुन्धराको यती पार्टी प्यालेसमा ल्याएर अहिले स्वास्थ्य परीक्षण गरेको उनले बताइन् ।

को-को फर्किए नेपाल ?

नेपाल फर्कने पहिलो सूचिमा परेकाहरुमा बिहेवारी एवं पारिवारिक पुनर्मिलन लागि म्यानमार आएर लकडाउनमा रोकिएकाहरु समेत छन् ।

त्यसैगरी कामको शिलसिलामा म्यानमारमा नेपालीहरु छन् । भिसा अवधि सकिएका, बौद्ध दर्शन पढ्न गएकाहरु नेपाल फर्केका हुन् ।

म्यानमारमा अन्तरािष्ट्रय गैरसरकारी संस्थामा कार्यरत नेपालीहरुलाई पनि स्वदेश पठाइएको दूताबास स्रोतले अनलाइनखबरलाई बतायो ।

दूतावास भन्छ– छुटेका अरु पनि नेपालीहरु छन्

नेपाल फर्कन चाहने नेपालीहरु अरु पनि रहेको, तर उनीहरु रहेको राज्यबाट अनुमति नपाइएको तथा राजधानीबाट टाढा भएका कारणले छुटेको दूताबासले जनाएको छ ।

दूतावास स्रोतका अनुसार रखाइन स्टेटमा रहेका तर तत्काल ल्याउन नसकेका सहितका अन्यलाई अर्को चरणमा नेपाल पठाइने तयारी थालिसकिएको छ । नेपाल फर्किएका सबैजनाको खर्च म्यानमार सरकारले नै व्यहोरेको दूतावासले जनाएको छ ।

यो पनि पढ्नुहोस

काठमाडौं आइपुगे म्यानमारमा रहेका २६ नेपाली [ फोटो फिचर ]