६ असार, विराटनगर । प्रदेश १ मा भारतबाट आउनेभन्दा नेपालबाट भारत जानेहरुको संख्या बढी रहेको पाइएको छ । प्रदेश १ मा नेपाल फर्कनेभन्दा भारत जानेको संख्यामा करिब दोब्बरको अन्तर छ ।
प्रदेश प्रहरी कार्यायल विराटनगरका प्रवक्ता प्रहरी उपरीक्षक दीपक सिग्देलका अनुसार २ असारसम्म प्रदेश १ का चारवटा जिल्लाका नाकाहरुबाट ११ हजार २ सय नेपाली भित्रिएका छन् । भारत फर्कनेहरुको संख्या २० हजार ७७ छ ।
झापाको काँकडभिट्टा नाकाबाट १६ हजार ३ सय ९३ जना भारत प्रवेश गरेका छन् । विराटनगर हुँदै बिहीबारसम्म ३ हजार ६ सय ७४ जना भारत प्रवेश गरेका छन् । इलामबाट २ जना भारत गएका छन् ।
भारतबाट नेपाल प्रवेशका लागि चार जिल्लामा नाका तोकिएको छ । मोरङको रानी नाका हुँदै ३ हजार ३७ जना नेपाल प्रवेश गरेका छन् । झापाबाट ६ हजार ७ सय ५६, इलामबाट ३३४ जना नेपाल प्रवेश गरेका छन् ।
सुनसरीबाट १ हजार ७३ गरी जम्मा ११ हजार २ सय जना नेपाल प्रवेश गरेका छन् । भारतबाट आएकाहरुलाई होल्डिङ एरियामा राखेर सम्बन्धित स्थानीय तहमा पठाउने गरिएको छ ।
