२० साउन, चितवन । चितवनमा मोटरसाइकल चोरी गरेको आरोपमा तीन जना पक्राउ परेका छन् । जिल्ला प्रहरी कार्यालय चितवनले दिएको जानकारी अनुसार पक्राउ पर्नेमा इच्छाकामना गाउँपालिका–७ गर्दासका ३० वर्षीय रामबहादुर गुरुङ, कालिका नगरपालिका–३ सिमलढापका २७ वर्षीय योगेश वाइवा र वडा नम्बर २ पदमपुरका २८ वर्षीय सुरज गुरुङ छन् ।
विभिन्न समयमा चोरी भएका मोटरसाइकलहरु र चोरीमा संलग्न शंकास्पद व्यक्तिहरुको पहिचान गर्ने क्रममा जिल्ला प्रहरी कार्यालय चितवन र इलाका प्रहरी कार्यालय टाँडीबाट खटिएको टोलीले उनीहरुलाई पक्राउ गरेको चितवनका प्रहरी प्रवक्ता एवं प्रहरी उपरीक्षक सूर्य थापाले जानकारी दिए ।
उनीहरुको साथबाट ना १३ प ८५३८ नम्बरको होन्डा मोटरसाइकल (वास्तविक ना ४१ प ९६०१), ना ४१ प ९६०१ (वास्तविक प्रदेश ३–०३–००१ प ४६८५) र ना ६५ प ४९०७ (वास्तविक स १० प १११८) नम्बरको मोटरसाइकल बरामद भएको प्रहरीले जनाएको छ ।
उनीहरुलाई चितवन जिल्ला अदालतबाट म्याद थप गरी अनुसन्धान भइरहेको छ ।
