Comments Add Comment

‘अयोध्या’बारे प्रधानमन्त्रीको रणनीति : पुरानो प्रमाण भेटिँदैन, मन्दिर बनाउन थालिहालौं !

भगवान रामको विशाल मूर्ति आफैंले बनाएर ठड्याउने प्रधानमन्त्रीको इच्छा

प्रधानमन्त्री केपी शर्मा ओली । फाइल फोटो

२५ साउन, काठमाडौं । राम जन्मभूमि अयोध्या नेपालमै पर्छ भन्दै आएका प्रधानमन्त्री केपी शर्मा ओलीले शनिबार चितवनको माडी नगरपालिकाका जनप्रतिनिधिसँग दुई घण्टा लामो छलफल गरे ।

बैठकमा नगरपालिकाका प्रमुख ठाकुरप्रसाद ढकाल, उपप्रमुख ताराकुमारी काजी महतो, नवगठित प्रस्तावित अयोध्यापुरीको व्यवस्थापन उपसमिति प्रमुख साध्यबहादुर भण्डारी, प्रचार–प्रसार तथा लेखन उपसमितिका डीआर पोखरेल र अनुसन्धान तथा अन्वेषण उपसमितिका प्रमुख लोकमणि पौडेललगायतको उपस्थिति थियो ।

कोरोनाको बढ्दो जोखिमकै वीचमा प्रधानमन्त्रीनिवासमा आयोजना गरिएको लामो छलफलमा प्रधानमन्त्री ओलीले माडीस्थित अयोध्यापुरीको खोजी र अनुसन्धान गर्नेतर्फ खासै जोड दिएनन् । धेरै हजार वर्ष पहिलेको राम जन्मभूमिको प्रमाण नभेटिने भन्दै बरु ‘शास्त्रीय उत्खनन्’लाई नै आधार मानेर अब मन्दिर निर्माणतर्फ ध्यान दिने मनसाय देखाए ।

‘तीन/चार हजार वर्षमा कत्राकत्रा भूकम्प गए । त्यतिबेलाको प्रमाण पाउन मुस्किल छ, बरु शास्त्रमा लेखिएका कुरालाई आधार मानेर गरिएको ‘शास्त्रीय उत्खनन’लाई आधार मानेर अघि बढ्दा सजिलो होला भन्नुभयो प्रधानमन्त्रीले’ छलफलमा सहभागी एक सदस्यले अनलाइनखबरसँग भने ।

बैठकमा सहभागी एक सदस्यका अनुसार त्यसका लागि सात फिट अग्लो रामको मूर्ति बनाउन कालीगढलाई समेत बोलाएर भनिसकेको प्रधानमन्त्रीले सुनाए

प्रधानमन्त्रीले दिएको समयभन्दा आधा घण्टाअघि अपराह्न पुगेको टोलीसँग अपराह्न ४ः४० देखि साँझ सवा ७ बजेसम्म प्रधानमन्त्रीले छलफल गरेका थिए । बैठकमा ओलीले सुरुमा नै अयोध्यापुरीमा भव्य मन्दिर बनाउने विषयमा तयारी थाल्न सुझाव दिएका थिए ।

बैठकमा सहभागीबीच कुराको सुरुवात साबिकको अयोध्यापुरी गाविस अहिले एउटा वडामा सीमित भएको र नगरपालिकाको नामै अयोध्यापुरी नराखेर माडी राखिएको विषयबाट भयो । त्यसलाई कुनै संकोचविना नै प्रधानमन्त्रीले त्यसको नाम परिवर्तन गरिहालौं न भनेर प्रस्ताव गरे ।

सँगै रहेका नगरप्रमुख र उपप्रमुखले स्वीकृतिस्वरूप मुन्टो हल्लाए । लगत्तै प्रमुख ढकालले अयोध्यापुरीभन्दा अयोध्या राख्न प्रस्ताव गरे । पछि रामायणमा पनि धेरै ठाउँमा अयोध्यापुरी भन्ने नाम उल्लेख भएकोले अयोध्यापुरी नै राख्ने सहमति भयो ।

अब यथाशीघ्र नगरप्रमुखले बैठक बोलाएर माडी नगरपालिकाको नाम अयोध्यापुरी राख्नको लागि पहल सुरु गर्नेगरी यो विषयलाई टुंगो लगाइएको थियो ।

त्यसलगत्तै प्रधानमन्त्रीले नै मन्दिर बस्तो बनाउने भन्ने विषय उठान गरे । उनले अयोध्यापुरी नेपालमै भएको कुरामा कुनै शंका नगर्न आग्रह गर्दै अब मन्दिर कस्तो बनाउने भन्ने प्रश्न बैठकमा सहभागीसँग प्रधानमन्त्रीले राखेका थिए ।

त्यसमा थप अनुसन्धान के गर्ने भनेर नगरपालिकाका प्रतिनिधिले राखेको प्रश्नमा नै प्रधानमन्त्रीले प्रमाण संकलन गर्न कठिन हुने भन्दै त्यतातिर धेरै ध्यान नदिन आग्रह गरे ।

प्रधानमन्त्रीलाई उद्धृत गर्दै बैठकमा सहभागी ती सदस्यले भने ‘कुटीजस्तो सानोतिनो मन्दिर बनाउने हो भने त्यसमा मेरो सहमति छैन । भव्य मन्दिर बनाउने हो भने मैले सकेको सहयोग गर्छु, सरकारले सहयोग गर्छ ।’

प्रधानमन्त्रीले देवघाटसम्मलाई समेटेर विशाल धार्मिक महत्वको क्षेत्र बनाउने गरी योजना बनाउन स्थानीय प्रतिनिधिलाई सुझाव दिएका छन् ।

प्रधानमन्त्री ओलीले मन्दिरमा राख्ने मूर्ति आफ्नो तर्फबाट निर्माण गर्ने प्रतिवद्धता व्यक्त गरे । बैठकमा सहभागी ती सदस्यका अनुसार त्यसका लागि सात फिट अग्लो रामको मूर्ति बनाउन कालीगढलाई समेत बोलाएर भनिसकेको प्रधानमन्त्रीले सुनाए ।

बैठकमा नै प्रधानमन्त्रीले क–कसको मूर्ति कसरी राख्ने भनेरसमेत सुनाएका थिए । राम, लक्ष्मण र सीताको फोटोको ठीकअघि हनुमानको मूर्ति राख्ने योजनासमेत प्रधानमन्त्रीले सुनाएका थिए ।

त्यसपछि राम मन्दिर कहिलेबाट सुरु गर्ने र कहिलेसम्म सम्पन्न गर्ने भन्ने विषयमा छलफल भयो । प्रधानमन्त्रीले जग्गा पहिचान गर्न नगरपालिकाका प्रतिनिधिलाई जिम्मा दिए । तर, भव्य मन्दिर बनाउन पुग्नेगरी जग्गा ठूलो क्षेत्रमा फैलिएको हुनुपर्ने प्रधानमन्त्रीको शर्त थियो । अहिलेदेखि सबै प्रक्रिया सुरु गरेर आगामी राम नवमीको दिन भूमिपूजा गर्नसके अर्काे राम नवमीसम्म काम सम्पन्न हुनेमा प्रधानमन्त्रीले विश्वास व्यक्त गरे ।

बैठकको अन्तिम एजेण्डाको रूपमा अहिले भारत हुँदै जानुपर्ने वाल्मीकि आश्रम पुग्नको लागि नेपालकै बाटो तयार पार्न पनि प्रधानमन्त्रीले पहल गर्ने सहमति भएको छ ।

ओलीले कुन बाटो सहज हुन्छ अध्ययन गरेर सुझाव दिन जनप्रतिनिधिलाई आग्रह गरेका छन् । त्यसपछि निकुञ्जमा भन्नुपरेमा आफूले भन्ने आश्वासन पनि प्रधानमन्त्रीले दिएका छन् ।

यो पनि पढ्नुहोस अरुलाई कोरोनाको चिन्ता, प्रधानमन्त्रीलाई ‘अयोध्या’ को !

यो खबर पढेर तपाईलाई कस्तो महसुस भयो ?

ट्रेन्डिङ

Advertisment