हिमालय टेलिभिजनबाट चाडै नै प्रशारण आरम्भ हुन लागेको सेलिब्रिटी डान्स रियालिटी शो ‘डान्सिङ विथ दि स्टार्स नेपाल’का एक प्रतिस्पर्धी हुन्, बुद्ध लामा ।
‘नेपाल आइडल’को उपाधि विजेता बुद्ध अहिले कोरियोग्राफर केविका खत्रीसँग डान्सका नयाँ नयाँ स्टेप सिकिरहेका छन् । बुद्धका लागि यो विधा नयाँ हो, तर उनले यसलाई चुनौतीको रुपमा स्विकार गरेका छन् ।
बुद्ध र केबिकासँग गरिएको भिडियो कुराकानी यहाँ हेर्नुहोलाः
अनलाइनखबरसँग बुद्धले भने–‘म गायन क्षेत्रमा छु, डान्सिङ विथ दि स्टार्सको प्लेटफर्म मेरा लागि नयाँ हो । यसले मलाई नयाँ स्थानमा पुर्याउनेछ । साथै, यो मेरा लागि नयाँ चुनौती पनि हो ।’
उनलाई सुरुवातमा त यो शोमा जाने कि नजाने भन्ने दुबिधा भयो । नजिकका मानिसहरुले पनि गाउन जन्मिएको मानिस, नाँच्न सक्दैनौं भनेर सल्लाहा दिए । तर, यो चुनौतीलाई स्विकार गरेर आफू भित्र रहेको प्रतिभा बाहिर ल्याउनुपर्छ भन्ने ठानेपछि बुद्धले यो रियालिटी शोमा सहभागीता जनाउने सोच बनाएका हुन् ।
बुद्धले भने–‘मलाई डर पनि लागिरहेको छ । पहिलो पटक स्टेजमा प्रस्तुत हुँदा दर्शकको ध्यान कसरी केन्द्रित गर्ने भन्ने चुनौती मसँग छ । म नाँच्दै ननाच्ने मान्छे, दर्शकले मलाई माया गर्नुहोला कि नहोला भन्ने डर लागिरहेको छ ।’
बुद्ध आफ्नो प्रस्तुतीबाट दर्शकहरु निराश नहुने बताउँछन् । भन्छन्–‘सायद म दर्शकलाई निराश हुन दिन्नँ । उहाँहरुले आशा गरे अनुसार नै म स्टेजमा प्रस्तुत हुन सक्छु भन्ने लागेको छ ।’
बुद्धले आफूलाई यसपटक पनि नेपाल आइडलमा जस्तै दर्शकको साथको आवश्यकता पर्ने भन्दै भोट गर्न आग्रह गरे ।
बुद्धलाई कोरियोग्राफी गरिरहेकी केविका खत्री आफूले सोचेको भन्दा सजिलोसँग बुद्धलाई डान्स सिकाइरहेको बताउँछिन् । उनले भनिन्–‘बुद्ध मिहिनेती छन् । मैले एउटा गायकलाई सिकाउन गाह्रो होला भन्ने सोचेकी थिएँ, तर त्यस्तो लागेन । उनीसँग जुन खालको स्वभाव छ, मैले सोही अनुसार नै सिकाइरहेकी छु ।’
बुद्धलाई कुनै पनि कुरा गाह्रो नलाग्ने तर्क केविकाको छ । केविकाको कुरा सुनेर मख्ख परेका बुद्धले आफ्नो प्रतिस्पर्धी आफै भएको बताए । भने–‘मेरो प्रतिस्पर्धी म आफै हो । मैले राम्रो गर्न सकिनँ भने मलाई कसले हेर्छ ?’
तस्वीर तथा भिडियोः शंकर गिरी
