१५ भदौ, सुर्खेत । कर्णाली प्रदेशमा पछिल्लो २४ घण्टामा ४० जनामा कोरोना भाइरस (कोभिड-१९)को संक्रमण पुष्टि भएको छ । प्रदेश अस्पताल, पशुपन्छी रोग अन्वेषण प्रयोगशाला सुर्खेतमा गरिएको पीसीआर परीक्षणमा सोमबार ४० जनामा संक्रमण पुष्टि भएको हो ।
सामाजिक विकास मन्त्रालय स्वास्थ्य सेवा महाशाखाको रिपोर्टअनुसार सुर्खेतमा मात्रै ३७ जना, जुम्ला, बाँके र बैतडीका एक/एकजनामा संक्रमण देखीएको छ ।
सर्खेतमा देखिएका ३७ जनामध्ये २८ जना वीरेन्द्रनगर नगरपालिकाका रहेका छन । वीरेन्द्रनगर नगरपालिका वडा नं.३, ४, ६, ७, ८ र १२ का १२ जना महिला र २५ जना पुरुषमा संक्रमण देखिएका छन् ।
त्यस्तै चौकुने गाउँपालिका- ४ की ६ वर्षीया एक बालिका र गुर्भाकोट नगरपालिका वडा नं. ८ र ९ का ८ जना पुरुष रहेका छन् । यससँगै कर्णणालीमा कोरोना संक्रमितको संख्या २४४२ पुगेको छ ।
साथै, कर्णालीमा सोमबार थप १५ जना कोरोना संक्रमित डिस्चार्ज भएका छन् । योसंँगै प्रदेशमा डिस्चार्ज हुनेको संख्या २०८६ पुगेको स्वास्थ्य महाशाखाले जनाएको छ । कर्णालीमा हालसम्म ६ जनाको मृत्यु भएको छ भने ३५० जना संक्रिय संक्रमित आइसोलेसनमा रहेका छन् ।
