१६ भदौ, काठमाडौं । स्वीडिस स्ट्राइकर ज्लाटन इब्राहिमोभिच थप एक वर्ष इटालियन क्लब एसी मिलानमै रहने भएका छन् । इब्राहिमोभिचले मिलानसँग एक वर्षको सम्झौता नवीकरण गरेका हुन् ।
३८ वर्षीय स्वडिस फरवार्डले गत जनवरीमा यता मिलानका लागि ११ गोल गरेका थिए । उनी जनवरीमा ६ महिनाका लागि मिलानमा अनुबन्ध भएका थिए ।
इब्राहिमोभिचले पहिलो पटक सन् २०१० मा मिलानका लागि खेलेका थिए र सिरी ए को उपाधिसमेत जितेका थिए । इब्राहिमोभिचले सोमबारदेखि टिमसँग प्रि-सिजनको ट्रेनिङ पनि सुरु गरिसकेका छन् ।
इब्राहिमोभिचले यसअघि इटलीकै युभेन्ट्स र इन्टर मिलान, नेदरल्याण्ड्सको अयाक्स, स्पेनको बार्सिलोना, फ्रान्सको पिएसजी, इंग्ल्याण्डको म्यानचेष्टर युनाइटेड र अमेरिकाको एलए ग्यालेक्सीका लागि खेलेका थिए ।
