३ कात्तिक, काठमाडौं । अजरबैजानका राष्ट्रपति इल्हाम अलियेवले आफ्नो सेनाले दक्षिणी जेलरेल क्षेत्रको थप १३ गाउँमा आफ्नो नियन्त्रण कायम गरेको दाबी गरेका छन् ।
सोमबार सामाजिक सञ्जाल ट्वीटरमार्फत् उनले यस्तो जानकारी दिएका हुन् । अजरबैजानले दाबी गरेअनुसारका गाउँहरु इरानको सीमानजिकैका क्षेत्रहरु हुन् । यसअघि अक्टोबर १८ मा अजरबैजानका राष्ट्रपतिले अराकज नदीमा बनेको खुदाफारिन पुलमा आफ्नो झण्डा फहराएको बताएको थिए ।
सन् १९९० को दशकदेखि उक्त पुल अर्मेनियाको कब्जामा थियो । उनले सेयर गरेको भिडियोमा पनि इरानी सेनाहरुले अजरबैजानका सेनाहरुलाई स्वागत गरिरहेको देखिएको थियो ।
अर्मेनिया र अजरबैजानबीच अहिले विवादित भूमि नागोर्नो काराबखको विषयमा युद्ध जारी छ । रुसको मध्यस्थतामा दुई पक्षको बीचमा युद्धविरामको सम्झौता भए पनि प्राप्त समाचार अनुसार दुवै पक्षले अहिलेसम्म युद्धविरामको सम्झौता पालना गरेका छैनन् । नागोर्गो काराबखले यो युद्धमा अहिलेसम्म सात सयभन्दा धेरैको मृत्यु भइसकेको बताएको छ ।
स्रोत : बीबीसी
