८ मंसिर, काठमाडौं । रुसका डानिल मेदभेदेब वर्षको अन्तिममा हुने टेनिस प्रतियोगिता एटीपी फाइनल्स उपाधि जितेका छन् ।
लण्डनमा आइतबार राति भएको फाइनलमा एक सेट हारेर पनि पुनरागमन गर्दै अष्ट्रियाका डोमिनिक थिमलाई पराजित गर्दै मेदभेदेबले उपाधि जितेका हुन् ।
चौथो वरियताका मेदभेदेबले तेस्रो वरीयताका थिमलाई ४-६, ७-६, ६-४ को सेटमा पराजित गरे ।
२४ वर्षीय मेदभेदेबको यो करियरकै सबैभन्दा ठूलो उपाधि हो । पहिलो पटक एटीपी फाइनल्सको उपाधि जित्ने क्रममा मेदभेदेबले शीर्ष वरीयताका तीन खेलाडीलाई पराजित गरे ।
समूह चरणमा शीर्ष वरीयताका नोभाक जोकोभिचलाई हराएका उनले सेमिफाइनलमा दोस्रो वरीयताका राफेल नाडाललाई पराजित गरेका थिए । उता थिमले समूह चरणमा नाडाल र सेमिफाइनलमा जोकोभिचलाई हराएका थिए ।
लण्डनमा अन्तिम पटक एटीपी फाइनल्स आयोजना भएको हो । अर्को वर्षदेखि यस प्रतियोगिता इटलीको टुरिनमा हुनेछ ।
