१६ मंसिर, विराटनगर । जुवा मुद्दामा अदालतले फैसला गरेको दुईसय रुपैयाँ जरिवाना नबुझाएका ९ जना ६ वर्षपछि पक्राउ परेका छन् ।
जिल्ला अदालत मोरङले जुवा मुद्दामा दुई सय रुपैयाँ जरिवाना तोकेका ९ जना मंगलबार पक्राउ परेका हुन् ।
प्रहरीले विराटनगर महानगरपालिका–७ का ३५ वर्षीय हंशराज जैन, विराटनगर–९ का ४१ वर्षीय रामबहादुर गुरूङ, लक्ष्मणबहादुर गुरूङ, ३० वर्षीय सुमित साह, विराटनगर–१० शान्तिचोकका ३२ वर्षीय विजय श्रेष्ठलाई पक्राउ गरेको हो । उनीहरुलाई २०७० वैशाख १२ गते अदालतले जुवा मुद्दामा दुई सय रुपैयाँ जरिवानाको फैसला सुनाएको थियो ।
पक्राउ परेकामध्ये जैन विराटनगरमा सट्टेबाजमा पनि सक्रिय रहेको प्रहरीको दाबी छ । उनी ७ वर्षयता फरार थिए ।
प्रहरीले विराटनगरको घोघापुल चोकबाट चार जना फरार प्रतिवादीलाई पक्राउ गरेको छ । विराटनगर–९ का ६० वर्षीय नविरज खाँ, ४४ वर्षीय मजमिल हुसेन, ६४ वर्षीय रजाक भनिने राजु खाँ र ६४ वर्षीय मुन्ना कुरेशीलाई पक्राउ गरेको हो । उनीहरुलाई जिल्ला अदालत मोरङले २०७१ जेठ २१ गते जुवा मुद्दामा दोषी ठहर गर्दै दुई सय रुपैयाँ जरिवानाको गरेको थियो ।
फैसला कार्यान्यन अभियान अन्तर्गत ९ जनालाई पक्राउ गरी अदालतमा बुझाइएको जिल्ला प्रहरी कार्यालय मोरङका डीएसपी मानबहादुर राईले बताए । उनीहरु जरिवाना बुझाएर छुटिसकेका छन् ।
