Comments Add Comment

सुदूरपश्चिममा नेकपाको अ‌ंकगणित : प्रचण्ड-नेपाल पक्षको पल्लाभारी

६ पुस, कैलाली । नेपाल कम्युनिस्ट पार्टी (नेकपा)का नेता लेखराज भट्टकै सिफारिसमा मुख्यमन्त्री बनेका त्रिलोचन भट्टले नेता भट्टको साथ छोडेपछि सुदूरपश्चिम प्रदेश सरकारमा प्रचण्ड–नेपाल पक्षको पल्ला भारी भएको छ ।

अहिले नेता भट्टको साथ छोडेर मुख्यमन्त्री भट्टले नेकपाका अध्यक्ष पुष्पकमल दाहाल प्रचण्ड र नेता भीम रावललाई साथ दिइरहेको उनी निकट एक नेताको भनाइ छ ।

प्रदेशमा मुख्यमन्त्री भट्टसहित ७ मन्त्री छन् । उनीहरूको सङ्ख्याको आधारमा प्रचण्ड–नेपाल पक्षको सङ्ख्या बढी छ । पूर्वएमालेबाट कानुनमन्त्रीसहित ४ र पूर्वमाओवादीबाट मुख्यमन्त्रीसहित ३ मन्त्री छन् ।

पूर्वएमालेमा रहेका तत्कालीन रावल निकट सामाजिक विकास मन्त्री दीर्घ सोडारीको कारबाही पछि पनि रावल निकट नै रहेका कृष्णराज सुवेदीलाई सामाजिक विकास मन्त्री बनाइएको थियो ।

यसका अलवा आन्तरिक मामिला तथा कानुनमन्त्री प्रकाश शाह, उद्योग पर्यटन वन तथा वातावरण मन्त्री माया भट्ट पनि रावल पक्षका हुन् । पूर्वएमालेका भौतिक पूर्वाधार विकास मन्त्री पठानसिंह बोहोरा केपी पक्षका मन्त्री रहेको पाइएको छ ।

यता पूर्वमाओवादीमा रहेका मुख्यमन्त्री भट्ट र भूमि व्यवस्था कृषि तथा सहकारी मन्त्री विनीता चौधरी प्रचण्ड पक्षमा छन् भने आर्थिक मामिला तथा योजना मन्त्री झपट बोहरा कुनै पनि पक्षमा खुलेर देखिएका छैनन् ।

‘अहिले कित्ताकाट गर्ने बेला आएको छैन । कित्ताकाटले पार्टी टुक्रिने अवस्था आउँछ,’ उनले भने, ‘त्यस्तो अवस्थामा पक्ष हेरौँला अहिले एकताको पक्षमा छु ।’

नेपाल–प्रचण्ड समूह बलियो

उसो त केन्द्रमा मतभेद सुरु हुनुभन्दा अघि नै तत्कालीन एमालेमा नेपाल र ओली गुट प्रष्ट देखिएको सुदूर पश्चिम प्रदेशमा अहिले प्रचण्ड-नेपाल समूह र ओली समूह गरी दुई खेमामा विभाजित छन् । ५३ जना प्रदेशसभा रहेको सुदूरपश्चिम प्रदेशमा तत्कालीन एमालेबाट २५ र माओवादीबाट १४ जना सांसद छन् । ३९ जना प्रदेश सभा सदस्यमध्ये अहिले अधिकांश प्रचण्ड-नेपाल खेमाका छन् ।

नेपाल–प्रचण्डसहित सुदूरपश्चिम प्रदेशमा केही योगेश भट्टराई र घनश्याम भुसाल निकटका पनि सांसदहरू रहेका छन् ।

प्रदेश सभामा ४ वटा विषयगत समिति छन् । प्रमुख प्रतिपक्ष दल नेपाली कांग्रेसले सार्वजनिक लेखा समिति पाएको छ भने नेकपाले ३ समिति पाएको छ । सामाजिक विकास समितिकी सभापति कुन्ती जोशी अझै पनि कुनै पक्षमा खुलेको देखिएको छैन । तर, उनलाई नेता लेखराज भट्ट निकट रहेको नेकपा स्रोत बताउँछ । जोशी भने आफू कुनै व्यक्ति विशेषको निकट नरहेको दाबी गर्छिन् ।

‘दुवै पक्षबाट कमजोरी भएको छ । म यो वा त्यो पक्षको होइन’ उनी भन्छिन् ‘पार्टी विभाजन भए पक्ष रोजौला ।’

अर्थ विकास तथा प्राकृतिक स्रोत समितिका सभापति हर्क बहादुर कुँवर रावल निकट छन् । विधायन तथा प्रदेश मामिला समितिका सभापति नेपालु चौधरी ओली निकट छन् ।

केन्द्रको किचलो प्रदेश सरकार हुँदै स्थानीय तहको सरकार र पाटी पंक्तिमा पनि परिसकेको छ ।
आइतबार धनगढीमा देखिएको दृश्यले त्यसलाई पुष्टि गर्छ । धनगढीमा ओली निकटका युवाहरूद्वारा पार्टी एकताको लागि प्रदेश स्तरीय युवा दबाव भन्दै आयोजना गरिरहँदा प्रचण्ड-नेपाल पक्षका युवाहरूले प्रदर्शन गरेका थिए । प्रदर्शनमा केही जनप्रतिनिधि पनि देखिएका थिए ।
पूर्वमाओवादी र एमालेबाट निर्वाचित भएकाहरू मात्रै होइन अहिले एउटै पार्टीबाटै निर्वाचित भएका तर, गुट फरक परेका स्थानीय तहमा पनि त्यसको बाछिटा पर्न लागेको छ ।

मुख्यमन्त्री र कानुनमन्त्री काठमाडौं जाँदै

सुदूरपश्चिम प्रदेशका मुख्यमन्त्री त्रिलोचन भट्ट र आन्तरिक मामिला तथा कानुनमन्त्री प्रकाश शाह काठमाडौं जाने भएका छन् ।

भोलि हुने भनिएको केन्द्रीय कमिटीको बैठकमा भाग लिन मुख्यमन्त्री भट्ट र कानुनमन्त्री शाह काठमाडौं जान लागेका हुन् । मुख्यमन्त्री भट्ट र कानुनमन्त्री शाह केन्द्रीय सदस्य हुन् । भट्ट प्रदेशमा दलको नेता र शाह उपनेता हुन् ।

संघीय संसद् विघटन पछि दलका नेता र उपनेता काठमाडौँ पुग्दा प्रदेश सरकारको विषयमा पनि चर्चा सुरु हुन थालेको छ । हाल दुवै जना प्रचण्ड–नेपाल पक्षमा देखिएका छन् ।

केन्द्रीय कमिटीको बैठक भन्दा पहिले दुवैले नेकपाका अध्यक्ष पुष्पकमल दालाल प्रचण्ड र वरिष्ठ नेता माधवकुमार नेपाललाई भेट्ने कार्यक्रम रहेको मुख्यमन्त्री कार्यालय स्रोतले जानकारी दिएको छ ।

‘भेटमा प्रदेश सरकारको विषयमा पनि छलफल हुन सक्छ,’ स्रोतले भन्यो, ‘तर, संघीय संसद् विघटन प्रकरण निचोडमा नआएसम्म प्रदेश सरकारमा हेरफेर गर्ने कुरा छैन ।’

यो खबर पढेर तपाईलाई कस्तो महसुस भयो ?

ट्रेन्डिङ

Advertisment