![](https://www.onlinekhabar.com/wp-content/uploads/2020/12/lalbahadur-shrestha.jpg)
८ पुस, काठमाडौं । ‘सर, कहाँ जानु हुने ?’, २०/२२ वर्षकी जस्ती देखिने युवतीले सोधेपछि सिन्धुलीका भोलाबहादुर जर्घा मगरले सहजै जवाफ फर्काए । मगर कलंकी जाने थाहा पाएपछि उनले चोभारसम्म पुर्याइदिन आग्रह गरिन् ।
चोभारमा युवतीलाई छाड्ने बेला भने मगर लुटेरा समूहको घेराबन्दीमा परे । त्यसपछि बल्ल चाल पाए, ‘हातमा सिक्री देखेपछि लुटेरा समूहले युवतीलाई प्रयोग गरेर चोभारसम्म ल्याएको रहेछ ।’
सुरुमा मगरले प्रतिवाद गर्ने कोशिस गरे । तर, लुटपाटमा संलग्न गिरोहले उनलाई रड प्रहार गरेर ६ तोला सुनको सिक्री, मोबाइल, चस्मा लगायत गरी ६ लाख ३५ हजार रुपैयाँ बराबरको सामान लगे ।
घटनालगत्तै मगरले प्रहरीलाई खबर गरे । तर, गत ८ साउनमा भएको यो लुटपाटमा संलग्न कोही पक्राउ परेका थिएनन् । ‘हालै हामीले लुटपाटमा संलग्न दोलखाको सागर भनिने लालबहादुर श्रेष्ठलाई पक्राउ गरेका छौं’, महाशाखाका एसपी ईश्वर कार्की भन्छन् ।
कार्कीका अनुसार श्रेष्ठसहितको समूहले अन्य ठाउँमा पनि युवतीको प्रयोग गरेर लुटपाट गरेको आशंका गरिएको छ । थप अनुसन्धान जारी छ ।
प्रतिक्रिया 4