दलित विकास समितिका पदाधिकारीले पाए नियुक्ति

१९ फागुन, जनकपुरधाम। प्रदेश २ सरकारले केही दिनअघि गठन गरेको दलित विकास समितिका पदाधिकारीलाई बुधबार नियुक्ति पत्र प्रदान गरिएको छ ।

समाजिक विकास मन्त्रालयले आयोजना गरेको एक कार्यक्रमकाबीच मुख्यमन्त्री लालबाबु राउतले उनीहरुलाई नियुक्ति पत्र प्रदान गरेका हुन् ।

त्यस अवसरमा बोल्दै मुख्यमन्त्री राउतले प्रदेशका १८ प्रतिशत दलित समुदायको पहिचान र अधिकार संरक्षण गर्नका लागि सरकारले दलित सशक्तीकरण ऐन बनाएको बताए ।

दलित विकास समितिलाई हरसम्भव सहयोग गर्ने बताउँदै उनले तत्काल कार्य अगाडि बढाउन नियुक्त भएका पदाधिकारीलाई निर्देशन समेत दिए ।

प्रदेश सरकारले केहि दिनअघि दलित विकास समितिको उपाध्यक्षमा रामप्रवेश बैठा तथा सदस्यहरुमा सेबकी देवी दास, श्यामसुन्दर सरदार, राजकुमार दास तत्मा र सुनिता मरिकलाई नियुक्त गरेको थियो ।

समितिका अध्यक्ष समेत रहेका समाजिक विकास मन्त्री नवल किशोर साहले नवनियुक्त पदाधिकारी र सदस्यलाई शुभकामना दिदै सरकारले हरसम्भव सहयोग गर्ने बताए ।